आजपासून कर्मचारी संपावर : कामकाज होणार ठप्पनागपूर : प्रशासनाचा कणा असलेल्या महसूल खात्यातील कर्मचारी शुक्रवारी १ आॅगस्टपासून बेमुदत संपावर जाणार असल्याने विभागीय आयुक्त, जिल्हाधिकारी आणि सर्व तहसील कार्यालयातील कामकाज ठप्प होण्याची शक्यता आहे. महसूल खात्यातील कर्मचाऱ्यांच्या मागण्यांसाठी गतवर्षी संप करण्यात आला होता. शासनाने या मागण्या मान्य करण्याचे आश्वासन दिले होते. ते पाळले नाही, म्हणून यावर्षी संघटनेने धरणे, लेखणी बंद आंदोलने केली. मात्र याची दखल न घेतल्याने संघटनेने संपाचे हत्यार उपसले. शुक्रवारपासून जिल्हाधिकारी कार्यालय, तहसील कार्यालय आणि विभागीय आयुक्त कार्यालयातील कर्मचारी कामावर येणार नाहीत, असे संघटनेच्या विभागीय शाखेने महसूल उपायुक्तांना तर जिल्हा शाखेने जिल्हाधिकाऱ्यांना निवेदन देऊन कळविले आहे. या संपाला राज्य मध्यवर्ती सरकारी कर्मचारी संघटना, राज्य स्टेनोग्राफर संघटना, राज्य शासकीय वाहन चालक संघटना, राज्य नायब तहसीलदार-तहसीलदार संघटनेने पाठिंबा जाहीर केला आहे. महसूल खात्याशी संबंधित या संघटना असून, या सर्वांनीच संपात सहभाग घेतला तर प्रशासनाचा कणा असलेल्या महसूल खात्यातील यंत्रणाच कोलमडून पडणार आहे.आम्ही आमच्या मागण्यांवर ठाम आहोत. सरकारनेच आता याबाबत निर्णय घ्यावा, असे संघटनेचे विभागीय अध्यक्ष गोपाल इटनकर, सरचिटणीस सतीश जोशी यांनी सांगितले. ‘महसूलदिना’ला सहकार्यदरवर्षी १ आॅगस्टला महसूलदिन साजरा केला जातो. यानिमित्त उत्कृष्ट काम करणाऱ्या महसूल कर्मचाऱ्यांचा व अधिकाऱ्यांचा गौरव केला जातो. संप असला तरी या कार्यक्रमाला सहकार्य करण्याची भूमिका महसूल कर्मचारी संघटनेने घेतली आहे. (प्रतिनिधी)संपाचा परिणामनागपूर जिल्ह्यात सरासरी ६०० ते ६५० महसूल कर्मचारी आहेत. ते संपात सहभागी झाल्यास दैनंदिन कामकाजाशिवाय महत्त्वाच्या कामावरही परिणाम होऊ शकतो. कार्यालयात रोज येणाऱ्या डाकेचे वाटप होणार नाही. सेतूमध्ये आलेल्या अर्जांची तपासणी महसूल कर्मचारी करतात, हे कामसुद्धा होणार नाही. मंत्रालयातून दर दिवशी विविध माहिती व आकडेवारी जिल्हा कार्यालयाला मागितली जाते.अधिकारी कामावर येणार असले तरी लिपिकाशिवाय फाईल हलत नाही, हे येथे उल्लेखनीय. कर्मचाऱ्यांच्या संपामुळे अधिकाऱ्यांचा ताण वाढणार आहे.
महसूल खात्याचा कणा मोडणार
By admin | Updated: August 1, 2014 01:09 IST