विदर्भात पावसाचा जोर कमी

दमदार पावसासाठी पाच ते सहा दिवसांची प्रतीक्षा

अकोला : पश्‍चिम बंगाल व ओडिशाच्या किनारपट्टीवर कमी दाबाचे क्षेत्र निर्माण झाल्याने गत तीन दिवसांत विदर्भात दमदार पावसाने हजेरी लावली; परंतु पाऊस प्रणाली पुन्हा अशक्त झाली असून, सार्वत्रिक पावसाचे ढग उत्तर-पूर्वेकडे वळल्याने, विदर्भातील पावसाचा जोर कमी झाला आहे. त्यामुळे आता सार्वत्रिक पावसासाठी आणखी पाच ते सहा दिवस प्रतीक्षा करावी लागणार आहे. अधूनमधून तुरळक पावसाच्या सरी मात्र येतच राहतील.गत सोमवारपासून ओडिशा किनारपट्टीवर कमी दाबाचे क्षेत्र निर्माण झाले होते. परिणामी छत्तीसगड व विदर्भात तीन दिवस दमदार पाऊस पडला; परंतु आता हे पावसाचे ढग उत्तर-पूर्वेकडे वळले आहेत. सध्या पूर्व मध्य प्रदेशावर कमी दाबाचा पट्टा तयार झालेला आहे. विदर्भात पाऊस येण्यासाठीची जी पाऊस प्रणाली आहे, ती यामुळे अशक्त झाली आहे. पाऊस प्रणाली साधारणत: दर आठ दिवसांनी विकसित होत असते. त्यामुळे आता पावसासाठी आणखी पाच ते सहा दिवसांची प्रतीक्षा करावी लागणार असल्याचे भाकीत, नागपूर वेधशाळेने वर्तविले आहे.दरम्यान, गेल्या चोवीस तासांत, विदर्भातील हिंगणा येथे १८ सेंटिमीटर पावसाची नोंद झाली असून, कळंबेश्‍वरला १६ सेंटिमीटर पाऊस झाला आहे. उमरेड येथे १५, चिमूरला १२, तर सावनेर, समुद्रपूर, नागपूर, भिवापूर, परसेओणी व कुही येथे प्रत्येकी ११ सेंटिमीटर पाऊस नोंदविण्यात आला आहे. तूमसरला १0, वर्धा, खारंचा व सेलू या ठिकाणी प्रत्येकी ९, तर हिंगणघाट, तिवसा, मोहाडी, आर्वी व आष्टी येथे प्रत्येकी ७ सेंटिमीटर पाऊस झाला आहे. रामटेक व सालेकसा येथे प्रत्येकी ६ सेंटिमीटर, तर मौदा, चिखलदरा, अमरावती, तिरोरा, मोर्शी, आमगाव व धामणगाव रेल्वे येथे प्रत्येकी ५ सेंटिमीटर पावसाची नोंद झाली आहे. धारणी, गडचिरोली, देवळी, चांदूर रेल्वे, पिनी, वरोरा, चांदूर बाजार, आकोट व सिंदेवाही या ठिकाणी ४ सेंटिमीटर पाऊस झाला आहे. मारेगाव, परतवाडा, देऊळगाव राजा, कामठी, गोरेगाव, राळेगाव, अर्जुनी-मोरगाव, बाभूळगाव, वरूड, आरमोरी, गोंदिया, लोणार, मेहकर, यवतमाळ, भद्रावती व चार्मोशी येथे ३ सेंटिमीटर पावसाची नोंद झाली आहे. अंजनगाव, सडक अर्जुनी, बटकुली, भंडारा, देवरी, वणी, कोपर्णा, कुरखेडा, ब्रम्हपुरी, आमरागड, धानोरा, मुल, लाखांदूर, साकोली, नांदगाव काझी, देसाईगंज, झरी झामणी, दर्यापूर व जोईली येथे २ सेंटिमीटर पावसाची नोंद झाली आहे. तेल्हारा, चंद्रपूर, घाटंजी, कळम, बल्लारपूर, नेर, मुर्तिजापूर, राजूरा, रिसोड, जळगाव जामोद, संग्रामपूर, अहेरी, शेगाव, गोंड पिपंरी, अकोला, दिग्रस, सिंदखेड राजा, लाखणी, वाशिम, पोमभूर्ण, धारवा नागभिड, व अरणी येथे प्रत्येकी १ सेंटिमीटर पावसाची नोंद वेधशाळेने केली आहे.