विरोधक म्हणाले, कामांचा हिशेब द्या!

महापालिकेतील सत्ताधारी जनतेला मोठमोठी स्वप्ने दाखवितात. आश्वासने देतात. मात्र, प्रत्यक्षात आश्वासनांची पूर्ती होत नाही. गेल्या पाच वर्षात घोषणा केलेले प्रकल्प अजूनही साकारलेले नाही.

मनपा सभागृहात झळकला लोकमत : सत्ताधाऱ्यांनी सभा गुंडाळलीनागपूर : महापालिकेतील सत्ताधारी जनतेला मोठमोठी स्वप्ने दाखवितात. आश्वासने देतात. मात्र, प्रत्यक्षात आश्वासनांची पूर्ती होत नाही. गेल्या पाच वर्षात घोषणा केलेले प्रकल्प अजूनही साकारलेले नाही. ‘लोकमत’ वृत्तपत्राने याचा लेखाजोखाच सादर केला, असे सांगत विरोधी पक्षनेते विकास ठाकरे यांनी महापालिका सभागृहात ‘लोकमत’ झळकविला. लोकमतमध्ये प्रकाशित विषयांवर चर्चा घेण्याची मागणी करीत ठाकरे यांच्यासह काँग्रेस- राष्ट्रवादीचे नगरसेवक हातात लोकमत घेऊन महापौरांच्या आसनासमोर आले. भाजप विरोधात नारेबाजी सुरू झाली. या गोंधळाचा फायदा घेत महापौर अनिल सोले यांनी पटापट विषय पुकारून मंजूर केले व सभा गुंडाळली. केंद्रीय मंत्री नितीन गडकरी एकीकडे नागपूर शहरात विकासाची गंगा आणण्यासाठी धडपड करीत आहेत. पण नागपुरात महापालिकेतील त्यांच्या शिलेदारांचे शहर विकासाकडे दुर्लक्ष झाले आहे. एक मिनिटात १४ विषय मंजूरलोकमतने प्रकाशित केलेल्या विषयावर जाब विचारण्यासाठी विरोधक महापौरांच्या आसनासमोर जमले. नारेबाजी सुरू केली. या संधीचा फायदा घेत गणिताचे ‘प्राध्यापक’ राहिलेले महापौर अनिल सोले यांनी पाढे म्हटल्यासारखे पटापट विषय क्रमांक वाचले. एका मिनिटात त्यांनी तब्बल १४ विषय कुठलीही चर्चा न करता मंजूर केले. विषय पत्रिकेवरील जुने प्रश्न निरस्त केल्यामुळे प्रश्नोत्तराच्या वेळेत महापौरांना चर्चा घेता आली असती पण तसे न करता त्यांनी सभा गुंडाळून लोकशाहीचा खून केला, अशी टीका विरोधी पक्षनेते विकास ठाकरे यांनी केली. महापौरांच्या आसनासमोर विरोधकांची घोषणाबाजीसत्ताधाऱ्यांनी न पेलणारी आश्वासने दिली. स्वप्ने दाखविली. प्रत्यक्षात एकही स्वप्न पूर्णपणे वास्तवात साकारले नाही. सत्ताधाऱ्यांनी दिलेली आश्वासने व त्यावर झालेली कृती याचा परिपाक ‘लोकमत’ने ‘नो उल्लू बनाविंग’ या विशेष पानाद्वारे बुधवारच्या अंकात प्रकाशित केला. विरोधकांनी हाच विषय महापालिका सभागृहात उचलून धरला. विरोधी पक्षनेते विकास ठाकरे यांनी लोकमत झळकवीत अपूर्ण राहिलेल्या घोषणांकडे सत्ताधाऱ्यांचे लक्ष वेधले. ठाकरे म्हणाले, सत्ताधाऱ्यांनी फक्त घोषणांवर भर दिला. जनतेची दिशाभूल केली. प्रत्यक्षात एकही प्रकल्प वेळेवर पूर्ण करण्यात त्यांना अपयश आले आहे. लोकमतने प्रकाशित केलेले वृत्त चुकीचे आहे का, याचा खुलासा करून या सर्व विषयांवर चर्चा झालीच पाहिजे, अशी आग्रही मागणी त्यांनी केली. यावर सत्तापक्ष नेते प्रवीण दटके यांनी वृत्तपत्राच्या बातम्यांवर सभागृहात विश्लेषण करता येणार नाही, असे मत मांडले. ठाकरे, गुडधे यांनी दटके यांच्या युक्तिवादाला जोरदार विरोध दर्शविला. सभागृहात चर्चा होणारच नसेल तर सभेला अर्थ काय, असा सवाल गुडधे यांनी केला. लोकमत उंचावत ठाकरे महापौरांच्या आसनासमोर आले. त्यांच्या पाठोपाठ प्रफुल्ल गुडधे हे देखील लोकमत उंचावत आले. त्यांच्या पाठोपाठ काँग्रेस- राष्ट्रवादीचे सर्व नगरसेवक चर्चेची मागणी करीत समोर आले. महापौर सोले यांनी विरोधकांना प्रश्नकाळ सुरू असल्याचे सांगत जागेवर बसण्याची सूचना केली. मात्र, त्यानंतरही विरोधक नमले नाहीत. विरोधकांनी सत्ताधारी भाजप विरोधात घोषणा देण्यास सुरुवात केली. एकच गोंधळ सुरू झाला. या गोंधळाचा फायदा घेत सत्तापक्ष नेते दटके यांनी विषय पत्रिकेला सुरुवात करण्याची सूचना केली. ही संधी साधत महापौरांनी पटापट एकएक विषय पुकारून मंजूर केले व सभा संपल्याची घोषणा केली. लोकमतने मांडलेल्या विषयामुळे १५ मिनिटात सत्ताधाऱ्यांना सभा गुंडाळावी लागली. (प्रतिनिधी)