एकीकडे राहुल गांधी यांची बहुचर्चित असलेली भारत जोडो न्याय यात्रा महाराष्ट्रात सुरु होण्यास अवघे काही तास शिल्लक आहेत. त्यातच आता काँग्रेसचे आमदार पक्षातील गटबाजीविरोधात बोलू लागले आहेत. काँग्रेसच्या आमदार प्रतिभा धानोरकर यांनी गंभीर आरोप केले आहेत. काँग्रेसमधील गटबाजीमुळेच खासदार पतीचा जीव गेल्याचा आरोप धानोरकर यांनी केला आहे.
लोकसभा निवडणुकीच्या पार्श्वभूमीवर काँग्रेसमध्ये गटबाजी सुरु झाली आहे. कोणाला तिकीट मिळणार यावरून एकमेकांचे पत्ते कापण्याचे काम सुरु आहे. चंद्रपूर लोकसभा मतदारसंघाचे दिवंगत खासदार बाळू धानोरकर यांचा या गटबाजीमुळेच जीव गेल्याचा गंभीर आरोप आमदार असलेल्या पत्नी प्रतिभा धानोरकर यांनी केला आहे. चंद्रपूर लोकसभा मतदारसंघातील प्रत्येक मतदारास याची माहिती आहे, असेही त्या म्हणाल्या आहेत.
टीव्ही ९ या मराठी वृत्तवाहिनीने याचे वृत्त दिले आहे. खासदार गेले तेव्हापासून माझ्या पक्षातील लोकच माझा विरोध करत आहेत. या विरोधामुळेच माझ्या पतीचा जीव गेला. पक्षातील लोकांनीच धानोरकरांना मानसिक त्रास दिला. आता ते माझ्या मागे लागले आहेत. एक जीव गेला, दुसरा जीव जाऊ देणार नाही, असा इशारा धानोरकर यांनी काँग्रेस नेत्यांना दिला.