विरार: आताच्या घडीला राज्यात विधान परिषद निवडणुकीच्या पार्श्वभूमीवर (Vidhan Parishad Election 2022) राजकीय वातावरण चांगलेच तापल्याचे दिसत आहे. राज्यसभा निवडणुकीतील विजयानंतर भाजपचा आत्मविश्वास वाढला असला, तरी या पराभवाचा वचपा काढण्यासाठी महाविकास आघाडीने जय्यत तयारी केली आहे. विधान परिषद निवडणुकीत छोटे पक्ष आणि अपक्षांची भूमिका महत्त्वाची ठरणार आहे. यातच राष्ट्रवादी काँग्रेसने ज्येष्ठ नेते एकनाथ खडसे (Eknath Khadse) यांना उमेदवारी जाहीर करत भाजपसमोर आव्हान उभे केल्याची चर्चा राजकीय वर्तुळात सुरू आहे. एकनाथ खडसे यांनी आपला विजय निश्चित करण्यासाठी अनेकांच्या भेटी-गाठी घेण्यास सुरुवात केली आहे. विशेष म्हणजे नाथाभाऊंनी भाजपच्या अनेक आमदारांशी संपर्क साधून निवडणुकीत मत देण्याचे आवाहन केल्याचे सांगितले जात आहे.
यातच एकनाथ खडसे यांनी बहुजन विकास आघाडीचे प्रमुख हितेंद्र ठाकूर (Hitendra Thakur) यांच्या भेट घेतली. विरारच्या विवा महाविद्यालयात या दोन्ही नेत्यांमध्ये बंद दाराआड तब्बल तासभर चर्चा झाल्याची माहिती मिळाली आहे. यानंतर प्रसारमाध्यमांशी बोलताना खडसे यांनी या भेटीविषयी माहिती दिली. दुसरीकडे, बहुजन विकास आघाडीचे तीन आमदार आहेत. या तीन मतांसाठी हितेंद्र ठाकूर यांच्याशी चर्चा सुरू आहे. एकनाथ खडसे यांच्याआधी भाजपच्याही अनेक नेत्यांनी हितेंद्र ठाकूर यांनी भेट घेतली होती.
३२ वर्षांपासून ओळख, यावेळी मदत करा
मी उमेदवार आहे. बविआकडे तीन मते आहेत. त्यामुळे मी मत मागायला आलो आहे. हितेंद्र ठाकूर योग्य तो निर्णय घेतील. मी शब्द घेण्यासाठी आलो नाही, तर मत मागण्यासाठी आलो. उमेदवार म्हणून मते मागणे आपले काम आहे. आमचा ३२ वर्षांपासूनचा संबंध आहे. या भेटीत राजकारणासह कौटुंबिक चर्चाही झाली, अशी माहिती खडसे यांनी दिली. तत्पूर्वी, हितेंद्र ठाकूर स्वत: आमदार आहेत. त्यांचे पुत्र क्षितिज ठाकूरदेखील विधानसभेचे सदस्य आहेत. मात्र ते सध्या अमेरिकेत आहेत. त्यांनी लवकरात लवकर भारतात परतावे आणि आपल्या बाजूने मतदान करावे यासाठी भाजप आणि मविआचे प्रयत्न सुरू आहेत. राष्ट्रवादीचे नेते आणि विधानपरिषदेचे सभापती रामराजे निंबाळकर यांनी देखील ठाकूर यांची भेट घेतली आहे.
दरम्यान, विधानपरिषदेवर निवडून येण्यासाठी पहिल्या पसंतीची २७ मतांची आवश्यकता आहे. राज्यसभेप्रमाणे मतदान झाले तर भाजपकडे १२३ संख्याबळ आहे. त्यामुळे भाजपच्या ४ जागा सहज निवडून येऊ शकतात. पाचव्या उमेदवारासाठी भाजपला १२ मते कमी पडतात. तर दुसरीकडे, महाविकास आघाडीकडे १६१ संख्याबळ आहे. त्यामुळे शिवसेना आणि राष्ट्रवादीचे प्रत्येकी दोन आमदार विधानपरिषदेत जातील. तसेच मित्र पक्ष आणि अपक्षांच्या मदतीने काँग्रेसच्या वाट्यालाही दोन जागा येऊ शकतात.