मुंबई : डॉक्टरांच्या शल्यकौशल्यास चेन्नई पोलिसांच्या अनोख्या दिलदारपणाची जोड मिळाल्याने हृदयविकाराने त्रस्त मुंबईतील एका तरुणीला सोमवारी जणू पुनर्जन्म मिळाला. या तरुणीवर प्रत्यारोपणासाठी लवकरात लवकर हृदय उपलब्ध व्हावे, यासाठी चेन्नई वाहतूक पोलिसांनी ‘ग्रीन कॉरिडॉर’ अमलात आणून शहराच्या १५ किमी रस्त्यावरील वाहतूक रोखून ठेवली. त्यामुळे ‘ह्रदय’ घेऊन निघालेल्या गाडीला हे अंतर १० मिनिटांत कापणे शक्य झाले.गेली चार वर्षे हृदयविकाराने त्रस्त असणाऱ्या २१ वर्षीय व्हॉवी मिनोचर्चाेमजी हिच्यावर सोमवारी चेन्नईमध्ये हृदय प्रत्यारोपणाची शस्त्रक्रिया यशस्वीरित्या पार पडली. मृत व्यक्तीच्या शरीरातून हृदय काढल्यावर पुढच्या चार तासांमध्ये हृदय प्रत्यारोपणाची शस्त्रक्रिया होणे गरजेचे असते. चेन्नईचे सरकारी रुग्णालय आणि ज्या रुग्णालयात प्रत्यारोपणाची शस्त्रक्रिया झाली, यामधले अंतर सुमारे १५ किमी इतके आहे. मात्र शस्त्रक्रियेसाठी लवकरात लवकर हृदय पोहचावे म्हणून चेन्नईमध्ये ‘ग्रीन कॉरिडोर’ निर्माण केला होता. सहाय्यक पोलीस आयुक्त (वाहतूक) यांच्याकडून परवानगी घेऊन रस्त्यावरील सर्व सिग्नल हिरवे करण्यात आले होते. या रस्त्यावरील वाहतूक थांबवण्यात आली होती. यामुळे हृदय सरकारी रुग्णालयातून खासगी रुग्णालयात केवळ १० मिनीटांत घेऊन येणे शक्य झाले. वांद्रे येथील व्हॉवी याच वर्षी बी.कॉम उत्तीर्ण झाली. ती तीन ते सहा महिन्यांपेक्षा जास्त जगू शकणार नाही, असे डॉक्टरांनी तिच्या पालकांना सांगितले होते. तिच्यावर उपचार करून तिला बरे करायचेच, असा निश्चिय तिच्या पालकांनी केला. म्हणून हृदय प्रत्यारोपण शस्त्रक्रियेसाठी ते तिला अमेरिकेमध्ये घेऊन जाणार होते. मात्र तिथे दोन वर्षांची प्रतीक्षा यादी असल्यामुळे तिथे घेऊन जाणे त्यांनी रद्द केले. मग तिला दोन आठवड्यांपूर्वी त्यांनी चेन्नईच्या फोर्टिस रुग्णालयात दाखल केले होते. (प्रतिनिधी)
मुंबईच्या मुलीचा चेन्नईत ‘हृदय’पालट
By admin | Updated: June 18, 2014 04:34 IST