Sanjay Raut vs BJP, Maharashtra Political Crisis: निवडणूक आयोगाने शिवसेना आणि धनुष्यबाण चिन्ह हे मुख्यमंत्री एकनाथ शिंदे (Eknath Shinde) गटाला दिले आहे. यामुळे राज्यातील सत्तासंघर्षाचा दुसरा अंक सुरु झाला आहे. राज्यभरातील शिवसेनेच्या शाखा ठाकरे गटाकडून शिंदे गटाने ताब्यात घेण्यास सुरुवात केली आहे. शिवसेना ज्यांची त्यांचे शिवसेना भवन असणार आहे. कारण शिवसेना भवन हे शिवसेनेचे प्रतिक आणि नावावर आहे. ते पक्षाचे मुख्यालय आहे. यामुळे शिंदे गट शिवसेना, धनुष्यबाणानंतर आता शिवसेना भवनावरही दावा सांगणार असल्याची शक्यता आहे. याच दरम्यान शिवसैनिकांची सहानुभूती उद्धव ठाकरे यांना मिळत असल्याचे चित्र सोशल मीडियावर दिसत आहे. पण याच मुद्द्यावरून मनसे नेते संदीप देशपांडे यांनी मात्र उद्धव यांना सणसणीत टोला लगावला आहे.
मी मुद्दामहून तुम्हाला रस्त्यावर भेटायला आलेलो आहे. कारण यापुढची लढाई ही रस्त्यावर लढायची आहे. धनुष्यबाण कोणी चोरला ते तुम्हाला माहिती आहे. चोर बाजाराचा मालक कोण ते देखील माहितीये. या चोरांना आणि त्यांच्या मालकाला गाडल्याशिवाय शांत रहायचे नाही, असं म्हणत उद्धव ठाकरे यांनी शनिवारी बाळासाहेब ठाकरें प्रमाणे ओपन जीप म्हणजेच सनरुफ उघडून शिवसैनिकांना संबोधित केले. त्या फोटोवरून मनसेचे संदीप देशपांडे यांनी उद्धव ठाकरेंवर टीका केली. "कर्तृत्वहीन माणसाला सहानुभूतीची गरज असते. पण लक्षात ठेवा मराठी माणूस भावनिक आहे, मूर्ख नाही; त्याला तुमची नाटकं माहित आहेत," असं ट्विट करत देशपांडे यांनी ठाकरे गटावर निशाणा साधला.
संजय राऊतांचा निवडणूक आयोगावर आरोप
"धनुष्यबाण चिन्ह आणि शिवसेना नाव मिळवण्यासाठी आतापर्यंत 2000 कोटींचा सौदा आणि व्यवहार झाले" असं म्हणत हल्लाबोल केला आहे. बऱ्याच गोष्टी लवकरच उघड होतील असं म्हणत इशारा देखील दिला आहे. संजय राऊत (Sanjay Raut) यांनी आपल्या ट्विटर अकाऊंटवरून याबाबत ट्विट केलं आहे. "माझी खात्रीची माहिती आहे.... चिन्ह आणि नाव मिळवण्यासाठी आतापर्यंत 2000 कोटींचा सौदा आणि व्यवहार झाले आहेत... हा प्राथमिक आकडा आहे आणि 100 टक्के सत्य आहे.. बऱ्याच गोष्टी लवकरच उघड होतील... देशाच्या इतिहासात असे कधीच घडले नव्हते..." असं राऊत यांनी म्हटलं आहे.