- ऑनलाइन लोकमत
पुणे, दि. 3 - सुरेंद्र आनंद स्मृति महाराष्ट्र हॉकी लीगमध्ये मेट्रो स्पोर्ट्स क्लबने शनिवारी धडाकेबाज विजयाची नोंद करताना रोव्हर्स अकादमीचा ११-०ने धुव्वा उडवला.
पिंपरी येथील नेहरूनगरमधील मेजर ध्यानचंद हॉकी स्टेडियमवर झालेल्या या लढतीत मेट्रो स्पोर्ट्स क्लबने रोव्हर्स अकादमीवर निर्विवाद वर्चस्व गाजवले. जेम्स परमारने सर्वाधिक ४ गोल (१९, २०, ३९, ४२वे मिनिट) करीत रोव्हर्सचा बचाव खिळखिळा केला. चिन्मय कोरडने २, तर मुकेश बिरांजे, मुसा तोरगल, गुफरान तोरगल, ए. सय्यद आणि अमित राजपूत यांनी प्रत्येकी १ गोल करीत चिन्मयला चांगली साथ दिली. विजयी संघ पूर्वार्धात ५-०ने आघाडीवर होता.
दुसऱ्या सामन्यात हॉकी लव्हर्सने सीवायबी संघावर ५-१ने विजय मिळवला. हॉकी लव्हर्सतर्फे आकाश बिलितकर, कौस्तुभ आंबेकर, मयूर जाधव, स्वप्नील गरसूंड, प्रणय गरसूंड यांनी प्रत्येकी १ गोल करीत विजयात मोलाचे योगदान दिले. सीवायबीतर्फे सिल्वराज पिल्ले यालाच एकमेव गोल करता आला. आकाश बेलितकर आणि प्रणय गरसूंड यांनी अनुक्रमे दुसऱ्या आणि २२व्या मिनिटाला गोल करीत आपल्या संघाला पूर्वार्धात २-०ने आघाडी मिळवून दिली होती.
उत्तरार्धातही हॉकी लव्हर्सच्या खेळाडूंनी सीआयबी संघावर दबाव कायम ठेवत ३२ व ३८व्या मिनिटांना गोल करीत आघाडी ४-०ने वाढवली. ४१व्या मिनिटाला सेल्वराजने सीवायबीचे खाते उघडले. ४४व्या मिनिटाला स्वप्नील गरसूंडने गोल करीत हॉकी लव्हर्सच्या विजयाचे अंतर वाढवले. रविवारी दुपारी ४ वाजता सेंट्रल रेल्वे विरुद्ध एअर फोर्स या संघांमध्ये सामना रंगणार आहे.
निकाल :
मेट्रो स्पोर्ट्स क्लब : ११ (जेम्स परमार ४, चिन्मय कोराड २, मुकेश बिरांजे १, मुसा तोरगल १, गुफरान तोरगल, ए. सय्यद १, अमित राजपूत १) विवि रोव्हर्स अकादमी : ०.
हॉकी लव्हर्स : ५ (आकाश बेलितकर, कौस्तुभ आंबेकर १, मयूर जाधव १, स्वप्नील गरसूंड १, प्रणय गरसुंड १) विवि सीवायबी : १ (सेल्वराज पिल्ले).