औरंगाबाद - जालना लोकसभा मतदार संघातील तिढा अखेर सुटला आहे. शिवसेना पक्षप्रमुख उद्धव ठाकरे आणि मुख्यमंत्री देवेंद्र फडणवीस यांच्या मध्यस्थीमुळे अर्जुन खोतकर आणि भाजपचे प्रदेशाध्यक्ष रावसाहेब दानवे यांच्यातील वाद मिटला आहे. हा तिढा सुटल्यानंतर अर्जुन खोतकर यांनी काँग्रेस आमदार अब्दुल सत्तार यांनी दिलेल्या ऑफर विषयी खुलासा केला.
एक वृत्त वाहिनीला दिलेल्या मुलाखतीत खोतकर म्हणाले, आपण याआधी अनेकदा लोकसभा निवडणुकीत दानवे यांच्यासाठी काम केले आहे. यापुढेही काम करणार आहे. मी कडवट शिवसैनिक, दगाफटका करणार नाही, मुख्यमंत्री देवेंद्र फडणवीस आणि शिवसेना पक्षप्रमुख उद्धव ठाकरे यांनी आपल्याला युतीधर्म समजावून सांगितला. माझ्यावर जी जबाबदारी पक्षाने टाकली आहे ती प्रामाणिकपणे पार पाडणार असल्याचे खोतकर यांनी स्पष्ट केले.
यावेळी खोतकर यांना सत्तार यांच्या भेटीविषयी विचारण्यात आले. त्यावेळी खोतकर म्हणाले, सत्तार माझे चांगले मित्र असून माझ्या कुटुंबातील सदस्य आहेत. त्यांच्याशी माझी मैत्री कायम राहिल. मी दुखावलेलो होतो. त्यांनी मैत्रीच्या नात्याने मला काँग्रेसमध्ये येण्याची ऑफर दिली होती. त्यामुळेच सत्तार यांनी आपण 'गुड न्यूज' देणार असल्याचे म्हटले होते, असा खुलासा देखील खोतकर यांनी केला आहे.
मागील अनेक दिवसांपासून खोतकर-दानवे यांच्या शीतयुद्धामुळे जालना लोकसभा मतदारसंघात नेमकं काय होणार याची चर्चा सुरू होती. अर्जुन खोतकर यांनी काँग्रेस नेत्यांच्याही भेटी घेतल्या होत्या. त्यामुळे रावसाहेब दानवे यांच्याविरोधात अर्जुन खोतकर काँग्रेसमध्ये प्रवेश करुन निवडणूक लढवणार अशा चर्चा मतदारसंघात सुरू होत्या. मात्र खोतकर यांनी माघार घेतल्यामुळे या चर्चांना आता पूर्णविराम मिळाला आहे.