Leopard Attack Dog Video:बिबट्या आणि कुत्रा समोरासमोर आले, तर कोण कोणावर मात करेल? असा प्रश्न विचारल्यावर तुम्ही म्हणाल, बिबट्याच जिंकेल. बिबट्या काही सेकंदात कुत्र्याचा फडशा पाडू शकतो. पण सध्या एक व्हिडिओ सोशल मीडियावर व्हायरल होतोय, ज्यात कुत्रा बिबट्यावर वरचढ झाल्याचे दिसत आहे. हा व्हिडिओ अहमदनगरचा आहे.
व्हायरल होत असलेल्या व्हिडिओमध्ये रात्रीच्या अंधारात बिबट्या घराच्या मुख्य दाराकडे आलेला दिसत आहे. यावेळी घरातील पाळीव कुत्रा दरवाजाजवळ अगदी आरामात झोपलेला दिसत आहे. यावेळी बिबट्याने डरकाळी फोडताच कुत्रा जागा होतो आणि जोर-जोराने बिबट्यावर भुंकू लागतो. आपला जीव वाचवण्यासाठी कुत्रा एवढ्या जोरात भुंकतो की, बिबट्या घाबरुन पळून जातो.
न्यूज एजन्सी एएनआयने ट्विटरवर व्हिडिओ शेअर करत अहमदनगरला लागून असलेल्या राहुरी भागातील व्हिडिओ असल्याची माहिती दिली. हा व्हिडिओ वन विभागानेही शेअर केला आहे. हा व्हिडिओ पाहून कुत्रादेखील बिबट्यावर भारी पडू शकतो, हे सिद्ध होते. सोशल मीडियाच्या वेगवेगळ्या प्लॅटफॉर्मवर यूजर्स हा व्हिडिओ शेअर करत आहेत.