देवेंद्रला मीच मोठे केले

राज्याचा विरोधी पक्षनेता असताना देवेंद्र फडणवीस यांना मीच सक्रीय केले. विदेशात सोबत नेऊन भाषणे करण्याची संधी दिली,

नागपूर : राज्याचा विरोधी पक्षनेता असताना देवेंद्र फडणवीस यांना मीच सक्रीय केले. विदेशात सोबत नेऊन भाषणे करण्याची संधी दिली, माझ्याकडील कागदपत्रे सभागृहात विषय मांडण्याकरिता दिली. कार्यकर्त्याला मोठे केलेले मला आवडते. देवेंद्रलाही हा नाथाभाऊ स्पर्धक वाटत नसेल, अशा शब्दांत महसूलमंत्री एकनाथ खडसे यांनी आपल्या भावना पत्रकारांकडे व्यक्त केल्या.माझ्यात काही त्रुटी असल्याने नेतृत्व करण्याची संधी पक्षाने मला दिली नसेल. त्या त्रुटी दूर करण्याचा प्रयत्न केला पाहिजे. मात्र आता मला कशाचीही अपेक्षा नाही. मला जे मिळाले आहे त्यामध्ये मी खूष आहे, असेही खडसे म्हणाले.आपल्या विरोधात वरचेवर येणाऱ्या बातम्यांमागे कुणी पक्षांतर्गत विरोधक आहे का, असे विचारले असता खडसे म्हणाले की, मी कधीच कुणाला टार्गेट केलेले नाही. त्यामुळे मला पक्षातील कुणी लक्ष्य करील असे वाटत नाही. फडणवीस यांनी सक्रिय व्हावे याकरिता त्यांना मदत केली. विदेशात जाताना सोबत घेऊन गेलो. तेथे इंग्रजीत भाषणे करण्याची संधी दिली. मी मुख्यमंत्री नसलो तरी या नाथाभाऊचे स्थान महाराष्ट्र व दिल्लीतही वरचे राहिले आहे. देवेंद्र यांना पक्षाचे अध्यक्ष करायचे होते तेव्हा दिल्लीतील वरिष्ठांनी सांगितले की, खडसेंचा फोन आल्याखेरीज देवेंद्र यांच्या नावाची घोषणा होणार नाही. पक्षश्रेष्ठींनी ही भूमिका घेतल्याने गोपीनाथ मुंडे हेही काहीसे अस्वस्थ झाले होते. पक्षाने आतापर्यंत तीनवेळा मला प्रदेशाध्यक्ष होण्याबाबत विचारले होते. नितीन गडकरी अध्यक्ष झाले तेव्हा लालकृष्ण अडवाणी जळगावमध्ये येऊन माझ्या नावाची घोषणा करणार होते. तेवढ्यात गडकरी यांनी मला दूरध्वनी केला आणि म्हणाले की, तुमच्याकरिता बायको बघायला गेलो होतो पण मीच लग्न करून टाकले.सुधीर मुनगंटीवार प्रदेशाध्यक्ष होण्याची वेळ आली तेव्हाही मला विचारणा केली होती. मात्र मी नकार दिल्यावर तुम्हाला विरोधी पक्षनेत्याचा लाल दिवा सोडवत नाही का? असा सवाल दिल्लीत केला गेला. परंतु तब्येतीच्या कारणास्तव आपण अध्यक्षपद घेतले नाही. देवेंद्र फडणवीस यांच्या निवडीचा विषय आल्यावर पुन्हा पक्षाकडून विचारणा झाली. गोपीनाथ मुंडे यांना मी स्पष्ट सांगितले की, मी तुमचा समर्थक आहे तुम्ही सांगाल त्याला माझा पाठिंबा राहील. एक दिवस मुंडे देवेंद्र यांना सोबत घेऊन आले व त्यांनी तत्कालीन राष्ट्रीय अध्यक्ष राजनाथ सिंह यांना दूरध्वनी लावून दिला. देवेंद्र यांच्या नावावर एकमत झाल्याचे मला सांगण्यास सांगितले, असेही खडसे म्हणाले. (विशेष प्रतिनिधी)