मुंबई: गेल्या काही दिवसांपासून कोणत्या प्रकारची भाषा ऐकायला मिळतेय, भावी पिढ्यांना अशा नेत्यांकडून काय शिकावं, अशा शब्दांत मनसे प्रमुख राज ठाकरेंनी शिवसेना खासदार संजय राऊत यांचा समाचार घेतला. आता राऊत यांनी राज यांना जबरदस्त प्रत्युत्तर दिलं आहे. आमचा पक्ष ओरिजिनल आहे. ही बाळासाहेब ठाकरेंची शिवसेना आहे. आमचा पक्ष नकलांवर चालत नाही, तर कामावर आणि संघर्षावर उभा आहे, अशा शब्दांत राऊत यांनी राज ठाकरेंना प्रत्युत्तर दिलं.
पुण्यात मनसेचा १६ वा वर्धापनदिन साजरा झाला. त्यानिमित्त आयोजित सभेत राज यांनी अनेकांना समाचार घेतला. संजय राऊतांची भुवया उडवून नक्कल करत राज यांनी त्यांची खिल्ली उडवली. राज यांच्या टीकेला संजय राऊत यांनी जोरदार प्रत्युत्तर दिलं. आम्ही कोणाचे मिंधे नाही. ईडीची नोटीस आली म्हणून आम्ही गप्प बसलो नाही. आम्ही बोलत राहिलो. आवाज उठवत राहिलो, असं म्हणत राऊत यांनी राज यांना टोला लगावला.
ओबीसी आरक्षण नव्हे, तर मुख्यमंत्री उद्धव ठाकरेंची प्रकृती उत्तम नसल्यानं निवडणुका पुढे ढकलण्यात आल्या, असा दावा राज यांनी केला होाता. त्यावर मुख्यमंत्री ठाकरेंइतकं सध्या सक्रीय कोणीच नाही. काही जण आजारी नसतानाही सक्रीय नसतात, असं म्हणत राऊत यांनी राज यांना चिमटा काढला.