डोंबिवलीत मतदानाआधी राजकीय राडेबाजी

कल्याण-डोंबिवली निवडणुकीत प्रचाराच्या अखेरच्या टप्प्यात हिंसाचाराच्या घटना घडल्या आहेत. गोळीबार, मारहाण, दमदाटी असे प्रकार घडल्याने शिवसेना, भाजपा व मनसेच्या उमेदवार

डोंबिवली : कल्याण-डोंबिवली निवडणुकीत प्रचाराच्या अखेरच्या टप्प्यात हिंसाचाराच्या घटना घडल्या आहेत. गोळीबार, मारहाण, दमदाटी असे प्रकार घडल्याने शिवसेना, भाजपा व मनसेच्या उमेदवार व कार्यकर्त्यांनी परस्परांविरुद्ध पोलिसांत गुन्हे दाखल केले.शिवसेना शहरप्रमुख भाऊसाहेब चौधरी यांच्या गाडीची तोडफोड करण्यात आली. त्यामध्ये चालक सुधीर दळवी जखमी झाला. चौधरी यांना घरी सोडून दळवी परत येत असताना हा हल्ला झाला. भाजपाच्या गुंडांनी हा हल्ला केल्याचा आरोप शिवसेनेने केला आहे, तर भाजपाने आरोप फेटाळून लावला. विष्णूनगर पोलिसांत भाजपाचे विकास म्हात्रे यांच्यासह ६० जणांवर गुन्हा दाखल करण्यात आला आहे.शिवमार्केटचे मनसेचे उमेदवार संदेश प्रभुदेसाई आणि भाजपाचे विश्वदीप पवार यांच्यात वाद झाल्याने याबाबत पोलिसांनी अदखलपात्र गुन्हा दाखल करून घेतला आहे. भाजपा ग्रामीणचे उपाध्यक्ष व रिक्षा संघटनेचे कार्याध्यक्ष संजय देसले यांच्या गाडीवर मोटारसायकलवरून आलेल्यांनी गोळीबार केला. सुदैवाने ते या हल्ल्यातून बचावले. (प्रतिनिधी)