Bacchu Kadu News: आगामी विधानसभा निवडणुकीच्या पार्श्वभूमीवर राज्यातील राजकीय घडामोडींना वेग येताना दिसत आहे. महायुती आणि महाविकास आघाडीत थेट लढत पाहायला मिळत असली तरी राज्यात तिसऱ्या आघाडीची चर्चा होऊ लागली आहे. काही घटक पक्ष दोन्ही आघाड्यांवर नाराज असल्याच्या चर्चाही राजकीय वर्तुळात आहेत. यातच आता प्रहार संघटनेचे प्रमुख आणि आमदार बच्चू कडू यांनी एक मोठे विधान केले आहे.
पत्रकारांशी बोलताना बच्चू कडू यांनी आगामी विधानसभा निवडणुकीबाबत मोठे भाष्य केले. १९ जुलै रोजी महायुती सरकारला आमच्या मागण्याचे निवेदन देणार आहोत. सरकारने आमच्या मागण्या केल्या तर माझी विधानसभा निवडणुकीतून माघार असणार आहे. माझी जागा महायुतीला देणार आहे, अशी घोषणा बच्चू कडू यांनी केली आहे.
बच्चू कडू यांनी दिले तिसऱ्या आघाडीचे संकेत
मी महायुती मध्ये नाही. कोणी सांगितले तुम्हाला मी महायुतीमध्ये आहे. आमची तिसरी आघाडी नाही तर शेतकरी, शेतमजूर, कष्टकरी यांची आघाडी तयार करू, असे बच्चू कडू यांनी म्हटले आहे. पेरणी ते कापणीपर्यंतची कामे रोजगार हमीमधून करावी, ५० टक्के नफा धरून शेतकऱ्यांच्या शेतमालास भाव द्यावा, दिव्यांगांना दरमहिना मानधन द्यावे, गरीब व श्रीमंतामधील विषमता वाढत चालली त्यात समता आणावी, अशा काही मागण्यांचे निवेदन बच्चू कडू महायुती सरकारला देणार असल्याची माहिती देण्यात आली.
दरम्यान, छोट्या-मोठ्या पक्षांना किंवा संघटनांना संपवायचे मोठ्या पक्षांची पर्याय व्यवस्था तयार करून ठेवण्याची प्रवृत्ती आहे. छोट्या मोठ्या पक्षांची अशीच कुचंबणा होत असते. स्वाभिमानी शेतकरी संघटना महायुतीमध्ये होती, त्यावेळेला आमची परिस्थिती काय झाली. रस्त्यावरची लढाई छोटे पक्ष लढत असतात. तिसरी आघाडी बिघाडी आमच्या डोक्यात काही नाही छोट्या पक्षांचे आमदार वाढवणे हेच आमच्यासमोर सध्या उद्दिष्ट आहे. तिसरी आघाडी म्हणजे थोतांड आहे. विधानसभेला बच्चू कडू आणि मी एकत्रित येऊ शकतो राजू शेट्टी यांनी म्हटले होते.