मुंबई : विलेपार्लेला राहणार्‍या सपना हिलरी परेरा (४०) या महिलेने भायखळा परिसरात उंचावर लागलेल्या जाहिरातीच्या होर्डिंगवर चढून आत्महत्येचा प्रयत्न केला. जे़जे़ मार्ग पोलीस आणि अग्निशमन दलाच्या जवानांनी सुमारे अर्धा-पाऊण तास विनवणी करून अखेर सपना यांना सुखरूप खाली उतरवले. हा प्रकार दुपारी दीड ते साडेतीन या वेळेत घडला. जे़जे़ मार्ग पोलिसांनी दिलेल्या माहितीनुसार दुपारी दीडच्या सुमारास सपना खडा पारशी चौकातील एका उंच होर्डिंगवर चढल्या आणि आत्महत्येची धमकी देऊ लागल्या. हा प्रकार चौकातून जाणार्‍या वाहनचालक आणि पादचार्‍यांनी पाहिला आणि नियंत्रण कक्षाला फोन केला. त्यानुसार, जे़जे़ पोलीस ठाण्यातील पथक तत्काळ घटनास्थळी दाखल झाले. त्यात महिला अधिकार्‍यांचा सहभाग होता. सुरुवातीला या पथकाने सपना यांच्याकडे खाली उतरण्यासाठी विनवणी केली. मात्र, त्या ऐकण्याच्या मन:स्थितीत नव्हत्या. त्यांनी खाली उतरण्यास नकार दिल्याने पोलिसांनी अग्निशमन दलाला बोलावून घेतले. पुढे अग्निशमन दलाने क्रेन आणून सपना यांना खाली उतरवले. तोपर्यंत साडेतीन वाजले. या प्रकारामुळे खडा पारशी चौकात बघ्यांची गर्दी जमली. वाहनेही हा प्रकार पाहण्यासाठी थांबू लागली. त्यामुळे दोनेक तास या चौकातून मुंबई व उपनगरांकडे जाणारी वाहतूक मंदावली होती. घराशेजारील एका कुटुंबाकडून मानसिक त्रासाच्या तक्रारीतून सपना यांनी आत्महत्येचा प्रयत्न केल्याचे पोलिसांकडून समजते. तसेच त्यांनी याआधीही दोनेक वेळेस अशा प्रकारे आत्महत्येचा प्रयत्न केल्याचीही माहती जे़जे़ मार्ग पोलिसांना मिळाल्याचे समजते. (प्रतिनिधी)
होर्डिंगवर चढून महिलेचा आत्महत्येचा प्रयत्न
By admin | Updated: May 29, 2014 03:23 IST