काही दिवसांपूर्वीच राज्यातील मंत्रिमंडळाचा विस्तार पार पडला. यामध्ये शिवसेनेच्या ९ आणि भाजपच्या ९ आमदारांनी मंत्रिपदाची शपथ घेतली होती. त्यानंतर रविवारी मुख्यमंत्री एकनाथ शिंदे यांनी मंत्र्यांना खातेवाटप जाहीर केलं. मुख्यमंत्र्यांकडे १० पेक्षा अधिक खात्यांचा कार्यभार असेल, तर उपमुख्यमंत्री देवेंद्र फडणवीस यांच्याकडे गृह, अर्थ सारख्या महत्त्वाच्या सात खात्यांचा कार्यभार असणार आहे. दरम्यान, अब्दुल सत्तार हे आता राज्याचे नवे कृषीमंत्री असतील, तर संजय राठोड यांच्याकडे अन्न व औषध प्रशासन विभागाची जबाबदारी असणार आहे.
काही दिवसांपूर्वीच झालेल्या मंत्रिमंडळ विस्तारानंतर कोणत्या मंत्र्यांकडे कोणती खाती असतील याची चर्चा सुरू झाली होती. दरम्यान, रविवारी मुख्यमंत्री एकनाथ शिंदे यांनी खातेवाटप करत सर्व चर्चांना पूर्णविराम दिला आहे. मुख्यमंत्री एकनाख शिंदे यांच्याकडे सामान्य प्रशासन, नगर विकास, माहिती व तंत्रज्ञान, माहिती व जनसंपर्क, सार्वजनिक बांधकाम(सार्वजनिक प्रकल्प), परिवहन, पणन, सामाजिक न्याय व विशेष सहाय्य, मदत व पुनर्वसन, आपत्ती व्यवस्थापन, मृद व जलसंधारण, पर्यावरण व वातावरणीय बदल, अल्पसंख्याक व औकाफ तसेच इतर कोणत्याही मंत्र्यांना वाटप न केलेले विभागांची जबाबदारी असणार आहे.
तर दुसरीकडे उपमुख्यमंत्री देवेंद्र फडणवीस यांच्याकडे गृह, वित्त व नियोजन, विधी व न्याय, जलसंपदा व लाभक्षेत्र विकास, गृहनिर्माण, ऊर्जा, राजशिष्टाचार या खात्यांचा कार्यभार असेल. काही दिवसांपूर्वी राज्याच्या मंत्रिमंडळाचा विस्तार करण्यात आला होता. परंतु या विस्तारात महिला आमदारांना संधी देण्यात आली नव्हती.
हेही वाचा - मोठी बातमी : फडणवीसांकडे गृह, तर विखेंकडे महसूल; शिंदे सरकारचं खातेवाटप जाहीर