ठाणे : घोडबंदर रोड, वाघबीळ परिसरातील हिरानंदानी इस्टेट रोड येथील मढवी निवास या बंगल्याच्या पहिल्या मजल्यावर लागलेल्या आगीत दोन जणांचा मृत्यू आणि तीन व्यक्ती सुखरूप बाहेर पडल्याची घटना आज घडली.
बाळकुम अग्निशमन केंद्रला या घटनेची माहिती मिळताच मुख्य अग्निशमन अधिकारी, कासारवडवली पोलीस स्थानकाचे पोलीस कर्मचारी, आपत्ती व्यवस्थापन कक्षाचे कर्मचारी, अग्निशमन दलाचे जवान हे उपस्थित होते. मढवी निवास हा तळ + ०२ मजली अशा स्वरूपाचा बंगला होता.
घटनास्थळी आग लागून एकूण ०५ व्यक्ती घरामध्ये अडकल्या होत्या. त्यातील ०३ - व्यक्ती स्वतःहून बाहेर पडल्या व दुसऱ्या मजल्यावर ०२ व्यक्ती अडकल्या होत्या त्यांना आपत्ती व्यवस्थापन कक्षाच्या कर्मचाऱ्यांकडून तसेच अग्निशमन दलाच्या जवानांकडून बाहेर काढण्यात आले असून बेशुद्ध अवस्थेत असल्याने त्यांना नजीकच्या रुग्णालयात दाखल करण्यात आले होते.
अभिमन्यू मढवी (पु / ६० वर्षे), रमाबाई मढवी (स्त्री/ ५५ वर्षे) या दोघांना हिरानंदानी रुग्णालयातील वैद्यकीय अधिकारी यांनी मृत घोषित केले तर प्रणाली मढवी (स्त्री / ३० वर्षे/), कविश मढवी (पु / १३ वर्षे ), पलाश मढवी (पु / १२ वर्षे/ ) यांना सुखरूप बाहेर काढण्यात आले. आगीचे कारण अद्याप समजले नसल्याची माहिती आपत्ती विभागाने दिली.