ऑनलाइन लोकमत
नागपूर, दि. २३ : शाळेमध्ये काही विद्यार्थी मोबाईलवर अश्लील चित्रफित बघत असल्यामुळे एका १३ वर्षाच्या मुलाने ३ वर्षाच्या चिमुकलीवर अत्याचार केल्याची घटना शांतिनगर पोलीस ठाण्याच्या हद्दीत घडली आहे. पाच दिवसानंतर या घटनेचा खुलासा झाला असून, पोलिसांनी आरोपी मुलास ताब्यात घेतले आहे. गेल्या १० दिवसात अल्पवयीन मुलीवर झालेल्या अत्याचाराचे हे दुसरे प्रकरण असून, पालकांमध्ये चिंतेचे वातावरण निर्माण झाले आहे.
आरोपी आणि पीडित मुलगी एकमेकांच्या शेजारीच राहतात. तीन वर्षाची ही मुलगी नेहमीच आरोपीच्या घरी खेळायला जायची. आरोपी ९ व्या वर्गाचा विद्यार्थी आहे. १७ आॅगस्टला पीडित मुलगी तिच्या आईसोबत बाहेर जात होती. परंतु आरोपीला बघताच ती रडायला लागली. घाबरून ती घरात गेली. त्यामुळे आईला संशय आला. आईने मुलीला विचारपूस केल्यावर तिच्यावर अत्याचार झाल्याचा प्रकार लक्षात आला. पीडितेच्या आईने शांतिनगर पोलीस ठाण्यात या प्रकरणाची तक्रार केली. पोलीसांनी बलात्कार व पॉस्को कायद्यान्वये गुन्हा दाखल करून अल्पवयीन आरोपीला अटक केली. १२ आॅगस्टला अजनी पोलीस ठाण्याच्या हद्दीतही एका १३ वर्षीय मुलाने ६ वर्षीय बालिकेवर अत्याचार केल्याची घटना घडली आहे.