मध्य प्रदेश विधानसभा निवडणूक प्रचारात गब्बर, जय-वीरूनंतर अमिताभ बच्चन आणि असरानी यांच्यानंतर आता सलमान खानच्या राधेची एन्ट्री झाली आहे. राजकीय नेते एकमेकांवर कुठल्या ना कुठल्या आरोपांचा वापर करत अनेकदा बॉलिवूड एक्टर्स आणि सिनेमातील कॅरेक्टरनं संबोधत आहेत. आता काँग्रेसच्या महासचिव प्रियंका गांधी यांनी निवडणुकीच्या मैदानात सलमान खानसह अमिताभ आणि असरानी यांचे नाव जोडले.
प्रियंका गांधींनी पंतप्रधान मोदींवरही भाष्य केले. त्या म्हणाल्या की, मोदींबाबत काही विचारू नका, ते देशातील एकमेव असे पंतप्रधान आहेत जे नेहमी त्यांच्याच दुखण्यासाठी त्रस्त असतात. कर्नाटकात गेले, तिथे शिव्या ऐकवल्या. मध्य प्रदेशात आले तरी शिव्या मोजल्या. पंतप्रधान मोदी नेहमी रडत असतात. सलमान खानचा सुपरहिट सिनेमा तेरे नामचा उल्लेख करतात जसं सलमान खान सिनेमात सुरुवातीपासून शेवटपर्यंत रडत होते. तसेच मोदी रडत राहतात. तसेच पंतप्रधान मोदींवरही एक सिनेमा बनवायला हवा. ज्याचे नाव मेरे नाम ठेवावं लागेल अशी खिल्ली उडवली.
मध्य प्रदेश निवडणूक प्रचारासाठी प्रियंका गांधी या दतियाला पोहचल्या होत्या. ज्याठिकाणी एका जाहीर सभेला संबोधित करताना प्रियंका गांधींनी नेहमीप्रमाणे त्यांच्या शैलीत भाजपावर जोरदार निशाणा साधला. प्रियंका गांधी म्हणाल्या की, मी ज्योतिरादित्य शिंदेंसोबत उत्तर प्रदेशात काम केलंय. उंचीत शिंदे भलेही छोटे असले तरी अहंकारात वाह भाई वाह..मला महाराज, वहाराज बोलण्याची सवय नाही. परंतु मध्य प्रदेशात जे येतात ते त्यांना महाराज बोलतात. विनामहाराज काम होत नाही असं लोक म्हणायचे. शिंदे यांनी त्यांच्या कुटुंबाची परंपरा चांगली जोपसली आहे असा टोला त्यांनी लगावला.
दरम्यान, विश्वासघात बऱ्याच लोकांनी केलाय, परंतु शिंदे यांनी ग्वाल्हेर आणि चंबलच्या जनतेसोबत विश्वासघात केलाय. त्यांनी जनतेच्या पाठित खंजीर खुपसला. राज्यात बनलेले सरकार पाडले. ज्या सरकारला जनतेने मते देऊन निवडून आणले होते. तर शिवराज सिंह चौहान हे जागतिक प्रसिद्ध अभिनेता आहेत. शिवराज सिंह एक्टिंगमध्ये अमिताभ बच्चनलाही मात देतील. परंतु कामाची गोष्ट कराल तर शिवराज असरानी यांच्या भूमिकेत येतात असं प्रियंका गांधी यांनी म्हटलं.