अहमदपूर (जि. लातूर) : चारित्र्याच्या संशयावरून शिक्षकाने पत्नीचा कत्तीने गळा चिरला, हातावर व पाठीवर सपासप वार केले. त्यानंतर उकळते तेल अंगावर टाकून तिची अत्यंत निर्घृणपणे हत्या केल्याची खळबळजनक घटना अहमदपूर शहरात घडली. याबाबत अहमदपूर पाेलिस ठाण्यात रविवारी गुन्हा दाखल केला आहे.
पाेलिसांनी सांगितले, हालसी (ता. निलंगा) येथील रहिवासी असलेल्या वैजनाथ दत्तात्रय सूर्यवंशी (वय ४३) या शिक्षकाची २०११ साली परभणी जिल्ह्यातून लातूर जिल्ह्यात बदली झाली. दरम्यान, सध्याला ताे खंडाळी (ता. अहमदपूर) येथील जिल्हा परिषद शाळेत कार्यरत आहे. अहमदपूर येथे राजसारथी कॉलनीत पत्नी शामल (वय ३५), ११ आणि ९ वर्षांच्या दोन मुलींसह ताे वास्तव्याला होता. काही दिवसांपूर्वी त्याने आपली मोठी मुलगी छत्रपती संभाजीनगर येथील भावाकडे शिक्षणासाठी पाठविली होती. सध्या घरात वैजनाथ, पत्नी शामल आणि ९ वर्षांची मुलगी असे तिघेच राहत हाेते.
वैजनाथ हा पत्नीच्या चारित्र्यावर संशय घेत असल्याने त्यांच्यामध्ये सतत वाद होत असत. पतीकडून हाेणाऱ्या सततच्या मारहाणीने त्रस्त झालेल्या पत्नीने यापूर्वी त्याच्याविरोधात तक्रार देण्यासाठी पाेलिस ठाण्यात गेली होती. मात्र, नातेवाइकांनी समजूत काढल्यानंतर तिने तक्रार मागे घेतली हाेती. मात्र, त्यानंतर शिक्षक वैजनाथ याने शांत डाेक्याने कट रचून पत्नीची हत्या केली.
याबाबत अहमदपूर पाेलिस ठाण्यात मयत शामल यांचा भाऊ मनोज प्रभाकर ढोले (वय २४, रा. श्रीमाळी, ता. भालकी, जि. बिदर) यांनी दिलेल्या तक्रारीवरून शिक्षक वैजनाथ दत्तात्रय सूर्यवंशी याच्याविराेधात रविवारी गुरु नं. २२७ / २०२३ कलम ३०२ भादंविप्रमाणे गुन्हा दाखल केला आहे.
शांत डाेक्याने कट रचून हत्या...
शुक्रवारी, १२ मे राेजीच्या रात्री पत्नी शामल आणि मुलीचे जेवण झाल्यानंतर वैजनाथ याने लहान मुलीला आतल्या खोलीत झोपवले. पत्नी शामल आणि वैजनाथ हे हॉलमध्ये झोपले होते. रात्री ११:०० ते १२:०० वाजण्याच्या सुमारास वैजनाथ याने अत्यंत शांत डोक्याने बायकोचा कत्तीने गळा चिरला. हतावर, पाठीवर सपासप वार करून अंगावर उकळते तेल टाकले. यामध्ये पत्नी शामलचा मृत्यू झाल्याची खात्री पटल्यानंतर त्याने घराचा दरवाजा पुढे करत धूम ठाेकली.
दुधवाल्यामुळे समाेर आली घटना...
पहाटे दूधवाला दूध घेऊन घरी आला असता, त्याने आवाज दिला. मात्र, आतून काहीच प्रतिसाद येत नसल्यामुळे त्याने दरवाजा ढकलताच हॉलमध्ये रक्ताच्या थारोळ्यात पडलेला मृतदेह आढळून आला. या घटनेची माहिती पोलिसांना देण्यात आली. दम्यान, पाेलिसांनी घटनास्थळी तातडीने भेट देऊन पंचनामा केला.