- राजकुमार जाेंधळे
लातूर : शहरातील लाड गल्लीत मुलीच्या लग्नकार्यासाठी घरात ठेवलेल्या पैशावर डल्ला मारणाऱ्या दाेघा चाेरट्यांना अवघ्या १२ तासांच्या आत रोख रकमेसह अटक करण्यात आली आहे. ही कारवाई गांधी चौक पाेलिस ठाण्याच्या पथकाने साेमवारी केली आहे.
पाेलिसांनी सांगितले, रविवारी गांधी चौक ठाण्याच्या हद्दीत लाड गल्लीत एका घराचा कडीकोयंडा तोडून चाेरट्यांनी आत प्रवेश केला. दरम्यान, घरातील लोखंडी पेटीचे कुलूप तोडून मुलीच्या लग्नकार्यासाठी ठेवलेली रोख २ लाख ८० हजारांची राेकड अज्ञात चाेरट्यांनी पळविली. याबाबत गांधी चौक पाेलिस ठाण्यात गुरनं. २४१/२०२५ कलम ३३१(१), ३०५ (अ) बीएनएसप्रमाणे गुन्हा दाखल करण्यात आला हाेता. पाेलिस अधीक्षक सोमय मुंडे यांनी गुन्ह्यातील आराेपींच्या मुसक्या आवळण्याचे आदेश दिले हाेते. अपर पोलिस अधीक्षक डॉ. अजय देवरे, लातूरचे डीवायएसपी रणजित सावंत यांच्या मार्गदर्शनाखाली गांधी चाैक ठाण्याचे पोलिस निरीक्षक साहेबराव नरवाडे यांच्या पथकाने गोपनीय माहितीच्या आधारे सतीश हुकूमचंद लाड (वय ५०) आणि संतोष विजयकुमार चापोलीकर (वय ४५, दाेघेही रा. लाड गल्ली, लातूर) यांना ताब्यात घेतले. कसून चाैकशी करत त्यांच्याकडून चाेरलेली २ लाख ८० हजारांची राेकड आणि गुन्ह्यामध्ये वापरलेली दुचाकी असा एकूण ३ लाख ४२ हजारांचा मुद्देमाल जप्त करण्यात आला आहे.
ही कामगिरी वरिष्ठांच्या मार्गदर्शनाखाली गांधी चौक ठाण्याचे पोलिस निरीक्षक साहेबराव नरवाडे, पोलिस उपनिरीक्षक अक्रम मोमीन, पाेलिस अंमलदार राजेंद्र टेकाळे, प्रकाश भोसले, राम गवारे, शिवाजी पाटील, संतोष गिरी यांच्या पथकाने केली.