जळकोट : तालुक्यातील २६ ग्रामपंचायतींसाठी येत्या शुक्रवारी मतदान होणार आहे. त्यामुळे प्रचार शिगेला पाेहोचला आहे. ग्रामपंचायतींवर वर्चस्व ठेवण्यासाठी स्थानिक पुढाऱ्यांचा कस लागला आहे. दरम्यान, मतदारांचा शोध घेण्यात उमेदवारांची दमछाक होत असताना दिसून येत आहे.
तालुक्यातील सोनवळा, बेळसांगवी, अतनूर, रावणकोळा, कुणकी, लाळी बु., बोरगाव, एकुर्का, घोणसी, चिंचोली, मेवापूर, धामणगाव, शेलदरा, विराळ, वडगाव, वांजरवाडा, शिवाजीनगर तांडा, सुल्हाळी, डोंगरगाव, येलदरा, गव्हाण, हळद वाढवणा, मरसांगवी, पाटोदा खु., कोळनूर, डोंगर कोनाळी अशा २६ ग्रामपंचायतींच्या निवडणुका होत आहेत. चिन्ह वाटपानंतर ग्रामीण भागात प्रचाराला वेग आला आहे. काही ठिकाणी दुरंगी, तर कुठे तिरंगी लढती होत आहेत.
वांजरवाड्यासारख्या मोठ्या गावात चौरंगी सामना होत असल्याने उत्सुकता वाढली आहे. पॅनल अधिक असल्याने मतदारांना कोणता उमेदवार कोणत्या पॅनलमधून आहे, याची खात्री करून घ्यावी लागत आहे. काही ठिकाणी जुन्या मोहऱ्यांसह नवीन चेहरे रिंगणात आहेत. गावातील पिण्याचे पाणी, रस्ते, वीज आदी विषय ऐरणीवर आले आहेत.
सध्या ग्रामीण भागात तूर काढणी, रबी पिकांतील अंतर्गत मशागतीची कामे सुरू आहेत. त्यामुळे मतदार घरी भेटत नाहीत. उमेदवारांकडून मतदारांचा शोध सुरू आहे. भेटलेले मतदार मी तुमचाच आहे, अशी चाणाक्ष उत्तरे देत आहेत.
वांजरवाड्यात चौरंगी सामना...
पंचायत समितीचे सभापती बालाजी ताकबिडे यांच्या वांजरवाडा गावात चौरंगी सामना होत आहे. राष्ट्रवादीचे तालुकाध्यक्ष अर्जुन आगलावे यांच्या धामणगावात दुरंगी, माजी जिल्हा परिषद सदस्य चंदन पाटील यांच्या सोनवळा गावात चुरशीची लढत होत आहे. युवक राष्ट्रवादीचे उपाध्यक्ष विठ्ठल चव्हाण यांच्या हळद वाढवणा गावात दुरंगी लढत होत आहे.
निवडणुकीसाठी तालुका प्रशासन सज्ज...
निवडणुकीची प्रशासकीय पातळीवर जय्यत तयारी सुरू आहे. उपविभागीय अधिकारी प्रवीण मेंगशेट्टी यांच्या मार्गदर्शनाखाली निवडणूक निर्णय अधिकारी तथा तहसीलदार संदीप कुलकर्णी, नायब तहसीलदार राजाभाऊ खरात, धनश्री स्वामी, शेख, पी.आर. घाटे, तलाठी विश्वासराव धुप्पे आदींची प्रशासकीय यंत्रणा सज्ज झाली आहे.
बाहेरगावच्या मित्रांची आठवण...
लॉकडाऊनच्या कालावधीत पुणे, मुंबईहून आलेल्यांवर सर्वांच्या नजरा होत्या. त्यांना क्वॉरंटाईन करण्यासाठी काही ठिकाणी वाद झाले. आता आपल्या पॅनलमधील उमेदवारांना निवडून आणण्यासाठी त्यांना मतदानासाठी गावात कसे आणता येईल, यासाठी अनेक जण प्रयत्नशील आहेत.