उदगीर (जि. लातूर) : चाॅकलेटसाठी पैसे मागणारी चार वर्षीय मुलगी आरुषीचा जन्मदात्याने साडीने फाशी देत खून केल्याची घटना भीमा तांडा (ता. उदगीर) येथे रविवारी दुपारच्या सुमारास घडली. याबाबत उदगीर ग्रामीण पाेलिस ठाण्यात आराेपी पित्याविराेधात रात्री उशिरा गुन्हा दाखल करण्यात आला आहे.
पोलिसांनी सांगितले, फिर्यादी वर्षा बालाजी राठोड हिचा विवाह २०१९ मध्ये भीमा तांडा येथील बालाजी बाबू राठोड याच्यासोबत झाला होता. दरम्यान, त्यांना एक मुलगा आर्यन, एक मुलगी आरुषी अशी दाेन अपत्ये झाली. फिर्यादीचा पती बालाजी बाबू राठोड याला दारूचे व्यसन जडले हाेते. यावरुन दाेघा पती-पत्नीमध्ये सतत वाद, भांडण होत असत. ताे दारू पिल्यावर पत्नीला मारहाण करून मुलांना जीवे मारण्याची धमकी देत होता. या भीतीपोटी फिर्यादी पत्नी वर्षा ही तीन महिन्यापूर्वी माहेरी निघून गेली होती. दरम्यान, ९ जून २०२५ रोजी पती बालाजी हा सासरवाडीत जाऊन मुलगी आरुषीला जबरदस्तीने भीमा तांडा येथे घेऊन आला होता. रविवारी दुपारी २:३० वाजण्याच्या सुमारास पत्नी वर्षा यांच्या काकाच्या मोबाईलवर सासू मंगलबाई बाबू राठोड हिने फोन करून सांगितले. तुझा पती बालाजी याने मुलगी आरुषी हिला राहत्या घरात साडीने फाशी देत ठार मारले आहे. मुलीला उदगीर येथील शासकीय रुग्णालयात नेले आहे. ही घटना कळल्यानंतर फिर्यादी पत्नी वर्षाने उदगीर येथील शासकीय रुग्णालयात धाव घेतली. मुलगी मृत झाल्याचे डॉक्टरांनी घोषित केले.
फिर्यादीचा पती बालाजी राठोड याने पाेटच्या चार वर्षीय मुलीने चॉकलेटसाठी पैसे मागितल्याच्या कारणावरुन साडीने फाशी देऊन तिचा खून केला, असे तक्रारीत म्हटले आहे. याबाबत उदगीर ग्रामीण पाेलिस ठाण्यात दिलेल्या तक्रारीवरुन आरोपी पती बालाजी राठाेड याच्याविराेधात गुन्हा दाखल केला आहे. पाेलिसांनी आराेपीला ताब्यात घेतले असून, तपास पोलिस उपनिरीक्षक रायपल्ले हे करीत आहेत.