उदगीर येथे कोरोना तपासणी प्रयोगशाळा उभारणीसाठी राज्यमंत्री संजय बनसोडे, जि.प. अध्यक्ष राहुल केंद्रे यांनी पाठपुरावा केला होता. जिल्ह्यातील कोरोना बाधिताचा पॉझिटिव्हिटी रेट १० टक्क्यांपेक्षा कमी आणण्याचे आणि दैनंदिन संख्या ३ अंकावरून २ अंकात आणण्याचे नियोजन करावे. ग्रामीण भागात कोरोना बाधितांचे संस्थात्‍मक विलगीकरण अनिवार्य करावे. ग्रामीण रुग्णालयाच्या ठिकाणी किमान ५ व्हेन्टिलेटरची व्यवस्था असावी, कोविड प्रादुर्भावात सर्व आरोग्य केंद्रात लहान मुलांची काळजी घेणारी व्यवस्था उभारावी, ग्रामीण भागातही लॉकडाऊनची अंमलबजावणी व्हावी, कोरोना बाधितांच्या संपर्कातील लोकांच्या चाचण्या वाढवाव्यात असे निर्देश पालकमंत्री देशमुख यांनी दिले.
व्हेन्टिलेटर बेडचे नियोजन हवे...
ग्रामीण आरोग्य केंद्रावर तेथील नागरिकांना प्राधान्याने लस दिली जावी. खेडेगावातून गंभीर आजारी असलेल्या नागरिकांना ऑक्सिजन, व्हेन्टिलेटर बेड मिळण्यात अडचणी येत आहेत. त्या बाबतही नियोजन व्हावे अशी सूचना आ. धीरज देशमुख यांनी केली. तर ग्रामीण भागात पुरेशा प्रमाणात लस उपलब्ध करून द्यावी, रुग्णवाहिका संख्या वाढवावी, उदगीर येथे टेस्टिंग लॅब उभारावी आदी मागण्या जिल्हा परिषद अध्यक्ष राहुल केंद्रे यांनी केल्या. सीईओ गोयल यांनी कोरोना परिस्थितीत यंत्रणा तत्परतेने काम करीत असल्याचे सांगितले.