उदगीर : लोहारा गावाजवळ कुमठ्याकडे जाणाऱ्या वळणावर नळेगाव रोडहून भरधाव वेगात येणाऱ्या पिकअपने रविवारी (दि. १९) रात्री ८ वाजेच्या सुमारास दुचाकीस जोराची धडक दिली. या अपघातात तिघे गंभीर जखमी झाले. त्यातील दोघांचा उपचारादरम्यान लातूर येथे मृत्यू झाला आहे.
याबाबत मृताच्या नातेवाइकांनी सांगितले, रविवारी रात्री ८ वाजण्याच्या सुमारास लोहारा गावाजवळील चौकाच्या पलीकडे कुमठा गावाकडे जाणाऱ्या वळणावर नळेगावकडून उदगीरकडे येणाऱ्या पिकअपने (क्र. एमएच ११, बीएल ४७३७) दुचाकीस (क्र. एमएच २४, एएन ३९५६) जोराची धडक दिली. या अपघातात अथर्व विलास भंडारे (१५, रा. हाळी, ता. उदगीर), नवनाथ विठ्ठल बोडेवार (१७), आदिनाथ विठ्ठल बोडेवार (१९, दोघेही रा. अतनूर, ता. जळकोट) हे तिघे गंभीर झाले.
दरम्यान, उदगीर ग्रामीण पोलिसांनी अपघातस्थळी जाऊन जखमींना उदगीरच्या शासकीय रुग्णालयात दाखल केले. सर्वांची प्रकृती गंभीर असल्याने प्रथमोपचार करून पुढील उपचारासाठी लातूरला हलवण्यात आले. उपचारादरम्यान अथर्व विलास भंडारे व आदिनाथ विठ्ठलराव बोडेवार या दोघांचा मृत्यू झाल्याचे नातेवाइकांना सांगितले. या अपघातप्रकरणी सोमवारी दुपारपर्यंत ग्रामीण पोलिस ठाण्यात कुठलीही नोंद नसल्याचे बीट अंमलदार पडिले यांनी सांगितले.