इचलकरंजीत रेकॉर्डवरील गुन्हेगाराची महिला पोलिसांशी अरेरावी
By लोकमत न्यूज नेटवर्क | Published: May 9, 2021 04:25 AM2021-05-09T04:25:50+5:302021-05-09T04:25:50+5:30
इचलकरंजी : मास्क न लावता मोटारसायकलवरून विनाकारण फिरणाऱ्या एका रेकॉर्डवरील गुन्हेगाराने कारवाई करताना महिला पोलिसाबरोबर अरेरावी केली. त्यामुळे त्याच्यावर ...
इचलकरंजी : मास्क न लावता मोटारसायकलवरून विनाकारण फिरणाऱ्या एका रेकॉर्डवरील गुन्हेगाराने कारवाई करताना महिला पोलिसाबरोबर अरेरावी केली. त्यामुळे त्याच्यावर शासकीय कामात अडथळा आणल्याप्रकरणी गुन्हा दाखल करून अटक केली. महेश अप्पासाहेब माळी (रा. लिगाडे मळा, जवाहरनगर), असे त्याचे नाव असून, शिवाजीनगर पोलीस ठाण्यात गुन्हा दाखल करण्यात आला आहे.
दरम्यान, त्याची वैद्यकीय तपासणी केली असता अहवाल पॉझिटिव्ह आल्याने खळबळ उडाली.
संचारबंदी असल्यामुळे विनाकारण फिरणाऱ्यांवर पोलीस कारवाई करत आहेत. अनेक ठिकाणी नाकाबंदी करण्यात आली आहे. तरीही काही तरुणमंडळी व नागरिक शहरात बिनधास्त फिरत आहेत. त्यामुळे पोलिसांनी ॲक्शन मोडवर येत कडक कारवाई सुरू केली आहे. दरम्यान, शिवाजीनगर पोलीस स्टेशन रोडवर बंदोबस्तासाठी असताना महेश माळी याला मोटारसायकलवरून विनामास्क फिरत असताना पकडले. त्याला महिला पोलिसांनी मास्क न घालता विनाकारण कशासाठी फिरत आहेस, असे विचारले. यावेळी त्याने महिला पोलिसांबरोबर हुज्जत घालत वर्दी उतरवूनच दाखवितो, अशी धमकी दिली. याची माहिती मिळताच शहरातील आजी- माजी नगरसेवकांसह त्याच्या समर्थकांनी शिवाजीनगर पोलीस ठाण्याच्या आवारात मोठी गर्दी केली होती.