टीईटी, सेट पेपर फोडणाऱ्या रॅकेटला दणका; प्रथमच मोठी कारवाई, आरोपींची संख्या वाढणार

काही शिक्षण संस्थांमधील भ्रष्ट पदाधिकाऱ्यांनी आपले नातेवाईक, पै-पाहुणे आणि लाखो रुपये देण्याची ऐपत असलेल्या उमेदवारांना हेरून पेपरफुटीचे रॅकेट चालवल्याचे पोलिसांच्या तपासातून समोर येत आहे.

उद्धव गोडसे

लोकमत न्यूज नेटवर्क

कोल्हापूर : शिक्षक पात्रता परीक्षा (टीईटी) आणि प्राध्यापक पात्रता परीक्षांचे पेपर फोडणाऱ्या टोळीचा पर्दाफाश करून पोलिसांनी रॅकेट उद्ध्वस्त केले. प्रश्नपत्रिका पुरवणाऱ्यांचा शोध सुरू असून, पेपरफुटीचा लाभ घेतलेले उमेदवारही पोलिसांच्या रडारवर आले आहेत. तपासातून काही संस्थाचालकांच्या सहभागाचे धागेदोरे मिळाल्याने या गुन्ह्याची व्याप्ती वाढण्याची शक्यता वर्तविली जात आहे.

काही शिक्षण संस्थांमधील भ्रष्ट पदाधिकाऱ्यांनी आपले नातेवाईक, पै-पाहुणे आणि लाखो रुपये देण्याची ऐपत असलेल्या उमेदवारांना हेरून पेपरफुटीचे रॅकेट चालवल्याचे पोलिसांच्या तपासातून समोर येत आहे. गेल्या सात ते आठ वर्षांपासून अतिशय गोपनीय पद्धतीने सुरू असलेल्या पेपरफुटीची माहिती मिळताच स्थानिक गुन्हे अन्वेषण शाखेच्या पथकाने सुरुवातीला नऊ आरोपींच्या मुसक्या आवळल्या होत्या. याप्रकरणात कोल्हापूरसह सांगली आणि सातारा जिल्ह्यांतून २७ आरोपींना अटक केली असून चौकशीतून ठोस पुरावे हाती लागताच पोलिसांनी आरोपपत्र दाखल केले आहे.

लाभार्थीही होणार आरोपी

पोलिसांनी अटक केलेल्या काही विद्यार्थ्यांनी एजंटांकडून प्रश्नपत्रिका मिळाल्याची कबुली दिली आहे.

पेपरफुटीचा लाभ घेऊन पात्र ठरलेल्या आणि सध्या शिक्षक, प्राध्यापक म्हणून कार्यरत असलेल्या लाभार्थ्यांची यादी पोलिसांना मिळाली आहे.

काही लाभार्थीही आरोपी होतील, अशी माहिती पोलिसांनी दिली.

काही संस्थाचालकांचा सहभाग

काही संस्थाचालक एजंटांच्या संपर्कात होते. त्यांचाही या रॅकेटमध्ये सहभाग असावा असा पोलिसांचा अंदाज आहे. त्यात कोल्हापूर आणि सातारा जिल्ह्यांतील काही संस्थाचालकांचा सहभाग आहे.

शैक्षणिक क्षेत्रात खळबळ

पेपर फुटीप्रकरणी दक्षिण महाराष्ट्रात प्रथमच मोठी कारवाई झाली. गुन्ह्याचा केवळ उलगडा करून पोलिस थांबलेले नाहीत, तर आरोपींना कठोर शिक्षा व्हावी यासाठी सबळ पुरावे गोळा केले जात आहेत. विद्यार्थ्यांसोबत एजंट, शिक्षक, प्राध्यापक आणि काही संस्थाचालकही कारवाईच्या टप्प्यात आल्याने शिक्षणक्षेत्रात खळबळ उडाली आहे.