चंदगड : कोल्हापूर जिल्हा परिषदेने जि.प. शाळेतील शिक्षक, शिक्षिकांना विशिष्ट रंगातील गणवेशात शाळेत येण्यासाठी आदेश काढला आहे. या आदेशाला चंदगड तालुक्यातील शिक्षक संघटनांनी विरोध केला आहे. याबाबतचे निवेदन पं.स. सभापती अ‍ॅड. अनंत कांबळे व गटशिक्षणाधिकारी सुमन सुभेदार यांना देण्यात आले आहे. जि.प. शाळेतील शिक्षक-शिक्षिकांना गणवेशाद्वारे ओळख निर्माण करून द्यायचा जिल्हा परिषद प्रशासन व पदाधिकाऱ्यांचा मनोदय आहे. तथापि, या उपक्रमाला जिल्ह्यातील विविध शिक्षक संघटनांनी विरोध दर्शविला आहे. या अनुषंगाने आज चंदगड तालुक्यातील सर्व प्राथमिक शिक्षक संघटना समन्वय समिती, पदाधिकारी व प्रतिनिधींनीही ‘ड्रेसकोड सक्ती’ मागे घ्यावी. याबाबतचे निवेदन चंदगड पं.स. सभापती अ‍ॅड. अनंत कांबळे, गटशिक्षणाधिकारी सुभेदार व शिक्षण विस्तार अधिकारी एम.टी. कांबळे यांना दिले आहे.
ड्रेसकोडबाबतीत शिक्षकांच्या तीव्र भावना लक्षात घेता प्रशासनाकडून कोणतीही कारवाई होऊ दिली जाणार नाही. हा आदेश मागे घेण्यासंदर्भात जि.प. पदाधिकाऱ्यांशी चर्चा करू, असे आश्वासन सभापती कांबळे यांनी समन्वय समितीला दिले.
यावेळी रमेश हुद्दार, धनाजी पाटील, शंकर मनवाडकर, गोविंद पाटील, सदानंद पाटील, अशोक नौकूडकर, बाबू परीट, एन.व्ही. पाटील, रवींद्र साबळे, राजू जोशी आदी उपस्थित होते.