बिबट्या महाडिकांचा हे राजकीय भांडवल : महाडिक

मी पशुप्रेमी असून माझ्याकडे सहा घोडी, दहा कुत्री, गायी, म्हशी, बैल अशी जनावरे आहेत. त्यामुळे बिबट्याला कोणतीही दुखापत होऊ न होता पकडावे, अशी सूचना आपण वनविभाग व जिल्हा प्रशासनासही दिली होती.

कोल्हापूर : भरवस्तीत आलेला बिबट्या हा जणू धनंजय महाडिक यांनीच पाळला असल्याची चर्चा करून या प्रकरणाचे काही लोकांकडून मुद्दाम राजकीय भांडवल केले जात असल्याची टीका खासदार धनंजय महाडिक यांनी आज, शुक्रवारी पत्रकारांशी बोलताना केली. बिबट्या आमचा होता असे म्हणणे हा निव्वळ बालिशपणा आहे, अशीही टिप्पण्णी त्यांनी केली.महाडिक म्हणाले, ‘आपण ३१ डिसेंबरला पार्टीसाठी त्याला आणले होते, असा प्रचार केला जात आहे. काही लोक याचे राजकीय भांडवल करीत आहेत. मी पशुप्रेमी असून माझ्याकडे सहा घोडी, दहा कुत्री, गायी, म्हशी, बैल अशी जनावरे आहेत. त्यामुळे बिबट्याला कोणतीही दुखापत होऊ न होता पकडावे, अशी सूचना आपण वनविभाग व जिल्हा प्रशासनासही दिली होती. त्याच्या अंगावर कोणतीही जखम नव्हती. तरीही याबाबत उलटसुलट चर्चा केली जात आहे. आपण आयुष्यात साधी मुंगीही मारलेली नाही. त्यामुळे आपल्याबाबत वर्तमानपत्रांसह इतरत्र सुरू असलेली चर्चा अर्थहीन आहे. त्या दिवशी सकाळी बिथरलेला बिबट्या कंपाउंडवरून उडी मारून शेजारील देशपांडे यांच्या घरात घुसला. वनविभाग, पोलीस, अग्निशमन दलाला तत्काळ कळविले. हे सर्व लोक आले; परंतु यांच्याकडे या बिबट्याला पकडण्यासाठी कोणतेही साधन नव्हते; त्यामुळे आपण माकडवाला वसाहत येथील मुलांना जाळे घेऊन येण्यास सांगितले. या सुंदर जनावराला साधी काठीसुद्धा मारू नका, असे सांगितले होते. (प्रतिनिधी)स्वसंरक्षणार्थ रिव्हॉल्व्हर हातात घेतलेजर तुम्ही पशुप्रेमी आहात, तर त्या दिवशी तुम्ही रिव्हॉल्व्हर का हातात घेतले? अशी विचारणा पत्रकारांनी केल्यावर महाडिक म्हणाले, बिबट्याने एकदा जर एखाद्याला पकडले तर तो सहजासहजी सोडत नाही. आपले कुटुंबीय या ठिकाणी होते. त्यामुळे तसा काही बाका प्रसंग आल्यास स्वसंरक्षणासाठी आपण रिव्हॉल्व्हर हाती घेतले होते.