कोल्हापूर : गतिरोधकावरून जाताना दुचाकीला हादरा बसताच तिच्या हेडलाईटच्या भागातून चक्क नाग बाहेर आला. नाग दिसताच चालकाने धावत्या दुचाकीवरून बाजूला उडी घेत आपला जीव वाचविला.
ऐतवडे खुर्द (जि. सांगली) येथील राहुल पाटील यांच्याबाबत मंगळवारी दुपारी तीनच्या सुमारास कोल्हापुरातील महावीर कॉलेज परिसरातील चौकात हा प्रकार घडला. कोल्हापुरात नोकरीला असलेले राहुल पाटील हे दुपारी दीडच्या सुमारास ऐतवडे खुर्द येथून दुचाकी घेऊन निघाले.
महावीर कॉलेजसमोरील चौकातील गतिरोधकावरून ते जाताना दुचाकीला हादरा बसताच हेडलाईटमधून नाग बाहेर येऊन तो राहुल यांच्या पायाच्या दिशेने जाऊ लागला. तो चावा घेईल या भीतीने त्यांनी पटकन धावती दुचाकी सोडून बाजूला उडी घेत स्वत:चा जीव वाचविला. दरम्यान, गतिरोधकावरून पुढे येताच गाडीवर समोर अचानक नाग येताच घाबरलो आणि बाजूला उडी घेतली. त्यामुळे जीव वाचला. परिसरातील नागरिकांच्या मदतीने नागाला बाहेर काढले असल्याचे राहुल यांनी सांगितले.