एकाच पोलीस ठाण्यात दोनऐवजी पुन्हा सहा वर्षे

पोलिसांत आनंद : राज्याचे पोलीस महासंचालक दयाल यांचा आदेश

कोल्हापूर : एकाच पोलीस ठाण्यात दोन वर्षांऐवजी आता पुन्हा सहा वर्षे सेवा करण्याचा आदेश आज, शुक्रवारी राज्याचे पोलीस महासंचालक संजीव दयाल यांनी जारी केला. आज हा नवा आदेश आल्याचे समजताच पोलीस कर्मचार्‍यांच्या चेहर्‍यावर आनंद दिसत होता. दोन आठवड्यांपूर्वी सहा वर्षांऐवजी एकाच विभागात चार वर्षे सेवा, तर एकाच पोलीस ठाण्यात दोन वर्षांपेक्षा जास्त सेवा केलेल्या पोलीस कर्मचार्‍यांना सेवा बजावता येणार नाही, असा आदेश काढला होता. दरम्यान, गृहमंत्री आर. आर. पाटील यांनी या बदल्यांबाबत दयाल यांच्याकडे दोन वर्षांऐवजी पुन्हा पोलीस कर्मचार्‍यांची सहा वर्षे करावी, अशी विनंती केली होती. १ फेब्रुवारी २०१४ रोजी राज्यातील पोलीस ठाण्यामधील ज्या कर्मचार्‍यांची सहा वर्षांपेक्षा जास्त सेवा झाली आहे त्यांच्या बदल्यांचे गॅझेट निघाले होते. दरवर्षी एप्रिल-मे महिन्यात पोलीस कर्मचार्‍यांच्या बदल्या होतात. मात्र, लोकसभा निवडणुकीमुळे बदल्यांची प्रक्रिया रखडली होती. दोन आठवड्यांपूर्वी दयाल यांनी एकाच विभागात चार वर्षे, तर एकाच पोलीस ठाण्यात दोन वर्षे सेवा करता येणार नाही, असा आदेश काढला होता. या आदेशामुुळे पोलीस ठाण्यातील सुमारे ८० पोलीस कर्मचार्‍यांना बदलून इतरत्र ठिकाणी जावे लागणार होते. दरम्यान, जिल्ह्यातील २८ पोलीस ठाण्यांतील ज्या पोलीस कर्मचार्‍यांची सेवा दोन वर्षे पूर्ण झाली आहे, अशा कर्मचार्‍यांच्याकडून बदल्यांसाठी पोलीस प्रशासनाच्या आस्थापना विभागाकडे १५ मेपर्यंत अर्ज मागविण्यात आले होते. नव्या आदेशामुळे त्यांच्या बदल्या आता होणार नाहीत. (प्रतिनिधी)