विश्वास पाटीलकोल्हापूर : कोल्हापूर उत्तर विधानसभा मतदारसंघातून भाजपची उमेदवारी मिळावी म्हणून कृष्णराज महाडिक, राहुल चिकोडे, महेश जाधव आणि सत्यजित कदम यांच्यात जोरदार रस्सीखेच सुरू असल्याचे चित्र सध्या दिसत आहे. महायुतीत हा मतदारसंघ नेमका कोणत्या पक्षाच्या वाट्याला जातो हे अजून स्पष्ट नाही, परंतु भाजपच्याच वाट्याला मतदारसंघ येणार, असे गृहित धरून मोर्चेबांधणी सुरू झाली आहे.या मतदारसंघात मागील २० वर्षांत दोन टर्म शिवसेनेला मिळाल्या आणि दोन वेळा काँग्रेसचा विजय झाला. नुकत्याच झालेल्या लोकसभा निवडणुकीतही काँग्रेसचे खासदार शाहू छत्रपती यांना या मतदारसंघाने १३८०८ इतके मताधिक्य दिले. त्यामुळे काँग्रेसचा उमेदवार कोण असणार हे विचारात घेऊन भाजप आपला उमेदवार निश्चित करणार हे स्पष्टच आहे. गेल्या २०१९ च्या निवडणुकीत काँग्रेसच्या चंद्रकांत जाधव यांनी तत्कालीन आमदार व नियोजन मंडळाचे आताचे कार्याध्यक्ष राजेश क्षीरसागर यांचा १५,१९९ मतांनी पराभव केला.पुढे २०२१ ला आमदार जाधव यांचे निधन झाल्यावर लगेच झालेल्या पोटनिवडणुकीत त्यांच्या पत्नी जयश्री जाधव या भाजपच्या सत्यजित कदम यांचा १९,२१० मतांनी पराभव करून विजयी झाल्या. पोटनिवडणुकीत शिवसेना काँग्रेससोबत होती. परंतु, नंतर महाराष्ट्रात सत्तांतर झाले आणि एकनाथ शिंदे भाजपसोबत गेले. मूळची ही जागा शिवसेनेची असताना पोटनिवडणुकीत ती भाजपकडे गेली. भाजपचाही पराभवच झाला असल्याने आता या जागेवर नेमका हक्क कुणाचा, असा प्रश्न उपस्थित होत आहे.विधानसभेच्या २०१४ च्या निवडणुकीत जेव्हा भाजप-शिवसेना स्वतंत्र लढली तेव्हा शिवसेनेने भाजपचा पराभव केला होता, हा एक बेस आहे. पण, आता भाजपची ताकद वाढली असून शिवसेना दुभंगली आहे. त्यामुळे भाजप जास्त आक्रमक आहे.
संभाव्य इच्छुक असे..
- भाजपकडून कृष्णराज महाडिक यांनी वाढदिवसाच्या निमित्ताने शक्तिप्रदर्शन करून रिंगणात उतरणार असल्याचे जाहीर केले आहे. खासदार धनंजय महाडिक यांनीही त्याच्या उमेदवारीचे समर्थन केले आहे. त्यामुळे तो प्रबळ दावेदार ठरू शकतो. महाडिक यांचे उपमुख्यमंत्री देवेंद्र फडणवीस यांच्याशी खूप जवळचे संबंध आहेत. भाजपच्या केंद्रीय नेतृत्वाच्याही जवळ आहेत. कृष्णराज याचे व्यक्तिमत्व तरुणाईला भुरळ घालणारे आहे. सोबत महाडिक गटाची ताकद आहे. या जमेच्या बाजू विचारात घेऊन ते पुढे निघाले आहेत. महाडिक कुटुंबियांशी संबंधित सत्यजित कदम यांचे काय होणार किंवा शेजारच्या कोल्हापूर दक्षिणमधून शौमिका महाडिक रिंगणात उतरणार असल्याने घराणेशाहीची टीका होणार हे गृहित धरून ते पावले टाकत आहेत, असे दिसते.
- महेश जाधव किंवा राहुल चिकोडे हे भाजपमधील मंत्री चंद्रकांत पाटील गटाचे म्हणजेच मूळच्या भाजपचे उमेदवार म्हणून तयारी करत आहेत. आम्ही अजून किती दिवस दुसऱ्याच्या पालख्या वाहायच्या, असा विचार करून हा गटही आता आक्रमक होऊ लागला आहे. आम्ही निष्ठावंत आहोत, त्यामुळे आमचाच उमेदवारीवर हक्क आहे असे त्यांना वाटते. स्वतः मंत्री पाटील यांनी तयारीला लागा असे आपल्याला सांगितले असल्याचे चिकोडे सांगत आहेत. ते स्वतः मंत्री पाटील यांनी उभ्या केलेल्या संस्थांशी जोडून आहेत. उमेदवार म्हणून मर्यादा, नेटवर्कचा अभाव असला तरी एकदा पक्ष पाठीशी असल्यावर आम्ही लढत देऊ शकतो, असे या दोघांनाही वाटते. भाजपच्या मूळच्या कार्यकर्त्यांना बाजूला करून नको त्यांना जवळ केल्याने लोकसभेला दणका बसला आहे. तसे पुन्हा नको असेल तर निष्ठावंत कार्यकर्त्याला संधी द्या, अशी मांडणी हा गट करत आहे.
- सत्यजित कदम यांनीही मतदारसंघात सगळीकडे लोकोपयोगी कामाचे फलक लावून आपणच भाजपचे उमेदवार असू, असे जाहीर केले आहे. ते एकदा काँग्रेसकडून आणि एकदा भाजपकडून पराभूत झाले आहेत. त्यामुळे त्यांना अजून किती वेळा संधी देणार, असाही मुद्दा चर्चेत आणला जात आहे. तसे घडलेच तर पर्याय तयार असावा म्हणून कृष्णराज यांची घोषणा महाडिक गटाने करून ठेवली आहे. पोटनिवडणुकीत कदम यांनी जरूर चांगली लढत दिली, परंतु त्यानंतर त्यांनी आपल्यातील दोष दूर करून आपणच या मतदारसंघातील हमखास जिंकणारा उमेदवार आहे, असा विश्वास ते निर्माण करू शकलेले नाहीत. संपर्क वाढवला आहे किंवा कोल्हापूरच्या प्रश्नांना ते भिडलेत, असेही कुठे दिसत नाही. पोटनिवडणुकीत त्यांना अगदी सहज उमेदवारी मिळाली होती. तसे चित्र आता नक्कीच नाही.