दिलीप चरणे
लोकमत न्यूज नेटवर्क
नवे पारगाव : हातकणंगले तालुका पश्चिम विभागातील पारगाव परिसरातील चौदा गावात कोरोना रुग्णांची संख्या घटु लागली आहे. थोडंसं दिलासादायक चित्र पहायला मिळत असले तरी मृत्युचे प्रमाण वाढू लागले असून, मृत्यू प्रमाण ४.२४ टक्के झाले आहे. लॉकडाऊन शिथिल झाल्यावर नियम न पाळता नागरिक सैरभैर वागत राहिले तर पुन्हा गंभीर परिस्थिती निर्माण होऊ शकेल.
हातकणंगले तालुक्यातील ६२ गावांपैकी चौदा गावांचा समावेश पश्चिम विभागात होतो. निलेवाडी, जुने पारगाव, नवे पारगाव, पाडळी, मनपाडळे, अंबप, अंबपवाडी, तळसंदे, चावरे, वाठार, किणी, घुणकी, भादोले व लाटवडे या चौदा गावांचा आढावा घेतला. या चौदा गावात आजपर्यंत ८९५ रुग्ण कोरोना पॉझिटिव्ह आढळले. पैकी ६८४ रुग्णांनी कोरोनावर मात केली असून १७३ रुग्ण उपचाराखाली आहेत. रुग्ण बरे होण्याचे प्रमाण ७६.४३ टक्के आहे. मृत्यूचे प्रमाण विचारात घेतले असता, नागरिकांनी नियम पाळून काळजी घेण्याची आवश्यकता आहे.
वाठार, मनपाडळे, पाडळी, अंबपवाडी या गावात मृत्यू संख्या शून्य आहे. नवे व जुने पारगावात मिळून १२ जणांचे कोरोनाने मृत्यू झाले आहेत. पारगावची वाढती रुग्णसंख्या विचारात घेऊन स्थानिक कोरोना समितीने कडक निर्बंध लावले, त्यामुळे रुग्ण बरे होण्याची संख्या वाढली, हे स्थानिक प्रशासन व वैद्यकीय यंत्रणेचे यश आहे. गावातील दुकानांसह केवळ अत्यावश्यक सेवाच सुरू ठेवल्या आहेत.
कोरोना रुग्णसेवेसाठी आरोग्य यंत्रणा सज्ज आहे. नवे पारगावचे शासकीय ग्रामीण रुग्णालय, अंबप व भादोले प्राथमिक आरोग्य केंद्र अहोरात्र सेवा देत आहेत. पारगाव ग्रामीणचे अधीक्षक डॉ. एम. जी. मुजावर, अंबप प्राथमिक आरोग्य केंद्राचे वैद्यकीय अधिकारी डॉ. शैलेश गायकवाड, भादोले प्राथमिक आरोग्य केंद्राच्या वैद्यकीय अधिकारी डॉ. माहेश्वरी कुंभार व त्यांचे कर्मचारी,आरोग्य सेवक, आशा वर्कर व कोविड कर्तव्यात असणारे शिक्षक अविश्रांत श्रम घेत आहेत.
चौदा गावची कोरोनाची सध्याची स्थिती खालील तक्त्यावरून स्पष्ट होत आहे.
तक्ता