कोल्हापूर : कोल्हापूर शेती उत्पन्न बाजार समितीच्या कांदा-बटाटा मार्केटमध्ये सुविधा द्या, या मागणीचे निवेदन कोल्हापूर जिल्हा माथाडी कामगार युनियनच्या वतीने सोमवारी समिती प्रशासनाला दिले. कांदा-बटाटा मार्केटमध्ये पिण्याच्या पाण्याच्या सोईसह इतर सुविधा तातडीने देण्याची मागणी त्यांनी लावून धरली.कांदा-बटाटा मार्केटमध्ये गेले अनेक दिवस पिण्याच्या पाण्याची सुविधा नाही. त्याचबरोबर शौचालय, बाथरूमही नसल्याने येथे येणाऱ्या शेतकऱ्यांबरोबरच हमाल, तोलाईदारांची गैरसोय होते. याबाबत माथाडी संघटनेने अनेकवेळा समिती प्रशासन व अडत्यांकडे मागणी केली होती; पण त्याकडे दुर्लक्ष केले होते.
सोमवारी माथाडी कामगारांनी मागण्यांचे निवेदन समितीचे सभापती बाबासो लाड व सचिव मोहन सालपे यांना दिले. यावेळी समितीचे संचालक परशुराम खुडे, माथाडी कामगार संघटनेचे नेते बाबूराव खोत, आकाराम केसरे, दीपक पाटील यांच्यासह माथाडी कामगार उपस्थित होते.
आठ दिवसांत पिण्याच्या पाण्याची सोयकांदा-बटाटा मार्केटमध्ये समितीच्या वतीने आठ दिवसांत पिण्याच्या पाण्याची सोय करून दिली जाईल. येथे विंधनविहीरीच्या माध्यमातून पाणी देण्याचे आश्वासन सभापती लाड यांनी दिले.
तर १ एप्रिलपासून कामबंद !वास्तविक स्वच्छतागृहाची सोय माथाडी कामगारांच्या संबंधित अडत दुकानदारांनी करायची आहे; पण त्यांच्याकडे मागणी करूनही ते दखल घेत नसल्याने माथाडी कामगार आक्रमक झाले आहेत. अडत दुकानदारांनी स्वच्छता गृहाची सुविधा दिली नाही, तर १ एप्रिलपासून कामबंद आंदोलन करण्याचा इशारा माथाडी कामगार संघटनेने दिला.