उद्योगांना ३० टक्के ऑक्सिजन वापरण्यास परवानगी द्यावी

कोल्हापूर : शेती उत्पादने, अत्यावश्यक दुरुस्ती, रुग्णवाहिका, ऑइल इंजिन, ऑक्सिजन उत्पादन, पुरवठा कोल्हापुरातील औद्योगिक वसाहतींमधून केला जातो. उद्योगांना ऑक्सिजनची नितांत गरज आहे. त्यामुळे जिल्ह्यातील उद्योगांना सद्य:स्थितीत ३० टक्के ऑक्सिजन वापरण्यास परवानगी द्यावी, अशी मागणी कोल्हापूर इंजिनिअरिंग असोसिएशनने रविवारी केली. याबाबतचे निवेदन असोसिएशनच्या वतीने पालकमंत्री सतेज पाटील, आ. चंद्रकांत जाधव आणि जिल्हाधिकारी दौलत देसाई यांना दिले.

जिल्ह्यातील कोरोना रुग्णांची संख्या वाढविल्याने प्रशासनाने गेल्या काही दिवसांपासून उद्योगांना ऑक्सिजन वापरण्यास पूर्णपणे बंदी घातली आहे. कोरोना रुग्णांना प्राध्यानाने ऑक्सिजन मिळाले पाहिजे. रुग्णसंख्या कमी होण्यासाठी प्रशासन सर्वतोपरी प्रयत्न करत आहे. प्रशासनाला आमच्या उद्योजकांकडूनही सर्वतोपरी सहकार्य केले जाते. या चांगल्या प्रयत्नामुळे कोल्हापूर जिल्ह्यात बाधित रुग्णांपेक्षा रुग्ण बरे होण्याचे प्रमाण जास्त असून हे प्रशासनाने केलेल्या कामाचे यश आहे. सध्या रुग्णसंख्या कमी होत आहे. त्यामुळे रुग्णांना लागणारा ऑक्सिजनचा वापर कमी होत आहे. काही ऑक्सिजनसाठा शिल्लक राहत आहे. सुदैवाने कोल्हापुरातही ऑक्सिजन उत्पादक आणि पुरवठादार असून यामुळे ऑक्सिजनबाबत कोल्हापूर सक्षम आहे. या परिस्थितीचा विचार करता उद्योगांना शंभर टक्के ऑक्सिजन वापरांवर घातलेल्या बंदीमध्ये थोडी शिथिलता द्यावी. उद्योगांसाठी ३० टक्के ऑक्सिजन उपलब्ध करून द्यावा, अशी मागणी या निवेदनाद्वारे कोल्हापूर इंजिनिअरिंग असोसिएशनचे अध्यक्ष सचिन मेनन, उपाध्यक्ष हर्षद दलाल आणि सचिव दिनेश बुधले यांनी केले.