दाट धुक्यामुळे कंटेनरची ट्रॅक्टरला मागून जोराची धडक, शियेतील ट्रॅक्टर चालकाचा मृत्यू 

शिये : दाट धुक्यामुळे समोरील वाहनाचा अंदाज न आल्याने कंटेनरची ट्रॅक्टरला मागून जोराची धडक झाली. या धडकेत ट्रॅक्टर चालकाचा मृत्यू झाला. किरण गबरू पाटील (वय-४९)  असे या मृत ट्रॅक्टर चालकाचे नाव आहे. पहाटेच्या सुमारास शिरोली येथील सांगली फाटा उड्डाण पुलाजवळ हा अपघात झाला.अधिक माहिती अशी की, किरण पाटील हे पहाटे साडेसहाच्या सुमारास ट्रॉली ट्रॅक्टर मधून शिरोली एमआयडीसी येथून मिळालेले भाडे घेऊन गोकुळ शिरगाव एमआयडीसीकडे निघाले होते. दरम्यान पहाटेपासून वातावरणात धुक्याचे प्रमाण जास्त असल्यामुळे पार्वती हॉटेल जवळ शिरोली पुलाची इथं भरधाव वेगाने मागून आलेल्या कंटेनरने ट्रॅक्टरला जोराची धडक दिली.या अपघातांमध्ये ट्रॅक्टर चालक किरण पाटील हे जागीच ठार झाले. यांना तातडीने सीपीआर येथे हलविण्यात आले असता त्याचा उपचारापुर्वीच मृत्यू झाला असल्याचे वैद्यकीय अधिकाऱ्यांनी सांगितले. या याबाबत शिरोली पोलीस पुढील तपास करीत आहेत.