उदगाव : निव्वळ अंधश्रद्धेच्या आहारी जाऊन निष्ठुर क्रूरकर्म्याने वरद पाटीलचा खून केला आहे. कागल तालुक्यातील सोनाळी गावात घडलेल्या घटनेबाबत नागरिकांत घबराट निर्माण झाली आहे. स्वत:च्या अपत्य प्राप्तीसाठी सात वर्षीय बालकाचा नरबळी हे घृणास्पद कृत्य आहे.
त्यामुळे उदगाव (ता. शिरोळ) येथे ग्रामस्थांनी वरद पाटील या बालकाला येथील छत्रपती संभाजी महाराज चौकात मेणबत्या लावून श्रद्धांजली वाहिली व संशयिताला तात्काळ फाशीची शिक्षा द्यावी, अशी अपेक्षा व्यक्त केली.
यावेळी उपसरपंच रमेश मगदूम म्हणाले, सोनाळी (ता. कागल) येथे वरद पाटील या सात वर्षीय बालकाचा वैद्य याने अंधश्रद्धेच्या आहारी जाऊनच नरबळी दिला आहे. याची सखोल चौकशी व्हावी व फाशीची शिक्षा मिळावी. नराधम वैद्य याची केस कोणत्याही वकिलाने घेऊ नये, असा ठराव ग्रा.पं.मध्ये करण्यात येईल. सर्वच ग्रामपंचायतींनी असा ठराव करून निषेध व्यक्त करावा, असेही मगदूम यांनी सांगितले. यावेळी अमोल माने, लाजम मुजावर यांनी संशयित वैद्य याची सखोल चौकशी करावी व अशा घटना पुन्हा होऊ नयेत यासाठी त्याला फाशी द्यावी, अशी मागणी केली.
यावेळी नंदकुमार पुजारी, शांतीनाथ वठारे, अभिनंदन पाटील, अनिल चिवटे, अनिकेत रजपूत, प्रदीप मगदूम, सौरभ पुजारी, गणेश कोरे यांच्यासह ग्रामस्थ उपस्थित होते.
फोटो - २२०८२०२१-जेएवाय-०६
फोटो ओळ- उदगाव (ता. शिरोळ) येथे सोनाळी येथील वरद पाटील या बालकाला श्रद्धांजली वाहण्यात आली.