जयसिंगपुरात अतिक्रमणावर हातोडा

नगरपालिकेची कारवाई : शाहूनगर बेघर वसाहतीमधील तीन भूखंड केले अतिक्रमण मुक्त

जयसिंगपूर : शहरातील बेघर वसाहतीमधील नगरपालिका मालकीच्या भूखंडावरील अतिक्रमणे काढण्यास सुरुवात झाली आहे. पोलीस बंदोबस्तात आज, गुरुवारी अतिक्रमण हटाव मोहीम राबवून लाकूड वखारीचे व जनावरांच्या गोट्याचे अतिक्रमण काढण्यात आले.शाहूनगर बेघर वसाहतीत नगरपालिकेच्या मालकीचे रिकामे भूखंड आहेत. त्यावर अतिक्रमण असल्याचे निदर्शनास आल्यानंतर पालिकेकडून सर्वेक्षण करण्यात आले होते. संबंधित अतिक्रमणधारकांना अतिक्रमणे काढून घेण्याबाबत सूचनाही देण्यात आल्या होत्या. याकडे दुर्लक्ष झाल्याने अखेर आज मुख्याधिकारी हेमंत निकम यांच्या आदेशानुसार अतिक्रमण विभाग, बांधकाम, आरोग्य व विद्युत विभागाने संयुक्तपणे अतिक्रमण हटाव मोहीम राबविली. पोलीस बंदोबस्तामध्ये नगरपालिका भूखंड क्रमांक १८४ वरील रामकृष्ण कोरवी व बशीर नदाफ यांनी केलेली लाकूड वखार व जनावरांच्या गोट्याचे अतिक्रमण काढून टाकण्यात आले. तसेच भूखंड क्रमांक ४६३ वरील लोखंडी अ‍ॅँगलचे वाहन पार्किंग शेडही काढून तिन्ही प्लॉट रिकामे करण्यात आले.अतिक्रमण हटाव मोहिमेत अतिक्रमण निर्मूलन अधिकारी जावेद मुल्ला, कनिष्ठ अभियंता राजेंद्र गवळी, सहायक मिळकत व्यवस्थापक विजय पाटील, स्वच्छता पर्यवेक्षक रमेश कांबळे यांच्यासह आरोग्य विभाग व पाणीपुरवठा विभागातील कर्मचारी सहभागी झाले होते. दरम्यान, नगरपालिकेच्यावतीने प्लॉटवरील अतिक्रमणे काढण्याची मोहीम सुरू राहणार असून, बेघर वसाहत येथील प्लॉटवरील अतिक्रमणे नागरिकांनी स्वत:हून काढून घेण्याचे आवाहन पालिकेने केले आहे. (प्रतिनिधी)