महाराष्ट्रातून कर्नाटक मार्गे बेकायदेशीर दारू व वाहतूक करणारा ट्रक अबकारी पथकाने बुगटे आलूर येथे चेकपोस्टवर ताब्यात घेऊन साडेचार लाखांचा मद्यसाठा जप्त केला. याप्रकरणी ट्रकचालक प्रदीप शिवाजीराव क्षीरसाठ (वय ४५, रा, सौदापूर, ता, कराड, जि. सातरा) याच्याविरुद्ध गुन्हा नोंद झाला आहे.
अधिक माहिती अशी, बेळगाव लोकसभा पोटनिवडणूक असल्याने बुगटे आलूर (ता. हुक्केरी) येथे चेकपोस्ट नाका उभारण्यात आला आहे. आजरा (जि. कोल्हापूर) येथून बुगटे आलूर मार्गे एमएच ०९/०६५३ हा मालट्रक जात असताना चेक पोस्ट नाक्यावरील अबकारी कर्मचाऱ्यांना संशय येऊन ट्रकची तपासणी केली.
यावेळी ४ लाख ७ हजार रुपये किमतीचे ६९८४ लिटरच्या ८०० बॉक्सच्या संत्रा बाटल्या आढळून आल्या. याबाबत चालक प्रदीपकडे चौकशी कली असता त्याच्याकडे महाराष्ट्रातील वाहतूक परवानाची कागदपत्रे होती. तथापि, कर्नाटक मार्गे वाहतूक परवाना नसल्याने अबकारी कायद्यान्वये त्याच्यावर गुन्हा दाखल करण्यात आला आहे.
याविषयी ४ लाख २७ हजार रुपये किमतीचा दारूसाठा आणि १८ लाख किमतीचा मालवाहतूक ट्रक असा एकूण २२ लाख २८ हजार रुपयांचा मुद्देमाल जप्त केला आहे.
हुक्केरी अबकारी विभागाचे प्रभारी दौलतराव व त्याच्या सहकाऱ्यांनी ही कारवाई केली आहे.
--------------------------------
* फोटो ओळी : बुगटे आलूर (ता. हुक्केरी) येथे बेकायदेशीर मद्यसाठा वाहतूक करणारा जप्त केलेला ट्रक व मद्यसाठा.
क्रमांक : १२०४२०२१-गड-०३