गडरक्षण हीच खरी शिवसेवा - शाहू छत्रपती; किल्ले भुदरगडवर ‘आपला मावळा’ तर्फे स्वच्छता मोहीम

खासदार नीलेश लंके यांचा साधेपणाचा धडा

गारगोटी : छत्रपती शिवाजी महाराजांचा जयघोष केवळ तोंडी नको,तर त्यांच्या गडांचे रक्षण आणि संवर्धन ही आपली जबाबदारी आहे,” असा प्रभावी संदेश खासदार खासदार शाहू छत्रपती यांनी दिला.खासदार नीलेश लंके यांच्या ‘आपला मावळा’ संघटनेतर्फे राबविण्यात येणाऱ्या गडसंवर्धन व स्वच्छता मोहिमेचा आठवा टप्पा किल्ले भुदरगड येथे रविवारी हजारो मावळ्यांच्या सहभागात उत्साहात पार पडला. या मोहिमेचा शुभारंभ खासदार शाहू छत्रपती, आमदार जयंत पाटील व ज्येष्ठ सामाजिक कार्यकर्ते व्ही. बी. पाटील यांच्या हस्ते झाला.शाहू महाराज म्हणाले,“गडांवरील स्वच्छता, मंदिर दुरुस्ती, सूचना फलक बसविणे हे छोटे उपक्रम असले तरी अत्यंत प्रभावी आहेत. नीलेश लंके यांनी पुढील पिढ्यांसाठी स्वच्छ, सुरक्षित आणि सशक्त गड सोडून देण्याचे कार्य हाती घेतले आहे.त्यांचे प्रयत्न शिवरायांचे विचार जनमानसात रुजविणारे आहेत. ‘आपला मावळा’ ही संघटना भविष्यात लाखो तरुणांना एकत्र करून शिवकार्याच्या रणांगणात उतरलेली दिसेल, असा मला विश्वास आहे.“शिवनेरीपासून सुरू झालेली ही मोहीम धर्मवीर, रायरेश्वर, रामशेज, तिकोना, प्रतापगड पार करून आता भुदरगडवर पोहोचली आहे. छत्रपती शिवाजी महाराजांच्या गडकोटांचा वारसा जतन करण्यासाठी हा उपक्रम आहे,” असे लंके यांनी सांगितले. गडसंवर्धनासाठी शासनाकडून विशेष निधी मिळविण्यासाठी प्रयत्न करण्याची ग्वाहीही त्यांनी दिली.रविवारी सकाळी ‘आपला मावळा’चे टी-शर्ट परिधान केलेले हजारो युवक-युवती“जय शिवराय!”च्या घोषात फावडे, कुदळ, झाडू हातात घेऊन गडाकडे रवाना झाले.यावेळी आर. के. पवार, राहुल देसाई, सत्यजित जाधव, प्रतीक पाटील, सुदेश सापळे, संतोष मेंगाने, अनिल घाटगे, सुनील शिंत्रे, प्रकाश पाटील, रणधीर मोरे, निखिल निंबाळकर, के. के. भारतीय उपस्थित होते.लंके यांचा साधेपणाचा धडाखासदार लंके यांच्या कार्यशैलीने प्रेरित होऊन हजारो मावळे या उपक्रमात सहभागी झाले. मात्र, त्यांनी कोणताही दिखावा न करता पुष्पनगर येथील शाळेत मुक्काम केला. पहाटे मावळ्यांसह जयघोषात गडाकडे प्रस्थान करणारा त्यांचा साधेपणा परिसरात चर्चेचा विषय ठरला.