कुरुंदवाड : गोकूळ दूध संघात टँकरच्या माध्यमातून स्वत:चा धंदा करणाऱ्या महाडिकांना या निवडणुकीत हद्दपार करा, ठरावधारक मतदार सुज्ञ असून या निवडणुकीत गोकूळमध्ये निश्चितच परिवर्तन करतील, असा विश्वास पालकमंत्री सतेज पाटील यांनी व्यक्त केला.
येथील जैन सांस्कृतिक भवनात गोकूळ दूध संघाच्या राजर्षी शाहू शेतकरी विकास आघाडीच्या निवडणूक प्रचारास प्रारंभ झाला. यावेळी मंत्री पाटील बोलत होते. अध्यक्षस्थानी नगराध्यक्ष जयराम पाटील होते. यावेळी आरोग्य राज्यमंत्री डॉ. राजेंद्र पाटील-यड्रावकर, खासदार संजय मंडलिक, आमदार राजेश पाटील प्रमुख उपस्थित होते.
मंत्री पाटील म्हणाले, दूध उत्पादक शेतकऱ्याला दुधाला दोन रुपये जादा दर मिळावा व संघातील महाडिकांची मक्तेदारी मोडून काढण्यासाठी गेल्या काही वर्षांपासून प्रामाणिक संघर्ष करत आहोत. त्यामुळे आमचा लढा दूध उत्पादक शेतकऱ्यांच्या न्याय हक्कासाठी असल्याने सत्ताधारी गटातील मातब्बर संचालक आमच्या लढ्यात सहभागी झाले आहेत. संघाच्या गत निवडणुकीत आम्हाला निसटता पराभव पत्करावा लागला. मात्र, गेल्या पाच वर्षात दूध दरवाढीसाठी, मल्टीस्टेटचा निर्णय रद्द करण्यासाठी रान उठविले. मल्टीस्टेटचा निर्णय रद्द झाल्यामुळेच आज सभासदांना किंमत आली असल्याचे सांगून पालकमंत्री पाटील यांनी दूध संघात लोकशाही प्रस्तापित करण्यासाठी आणि स्पर्धेच्या युगात गोकूळ टिकविण्यासाठी जिल्ह्यातील सर्व नेतेमंडळी एकत्र आल्याचे सांगत सत्तांतर होणार असल्याचा विश्वास त्यांनी व्यक्त केला.
मंत्री यड्रावकर म्हणाले, तालुक्यात १३४ सभासद असताना सत्ताधारी गटाकडून उमेदवारी डावलली जात आहे. या निवडणुकीत परिवर्तन होणारच आहे. मात्र, सत्तेत आल्यानंतर आगामी काळात शिरोळ तालुक्याला संधी मिळावी. शिवाय इतर दूध संस्थांना सभासद करून घेतल्यास दूध संकलन दोन लाखाच्या पुढे नेऊ, असे स्पष्ट करून तालुक्यातून निर्णायक मते मिळवून देण्याचा विश्वास दिला.
यावेळी माजी खासदार निवेदिता माने, गोकूळचे माजी अध्यक्ष विश्वास पाटील, दिलीप पाटील यांची भाषणे झाली.
सभेस नगराध्यक्ष जयराम पाटील, अमरसिंह पाटील, अरुण नरके, बाबासाहेब पाटील, प्रकाश पाटील, माजी आमदार उल्हास पाटील, वैभव उगळे उपस्थित होते. स्वागत गणपतराव पाटील तर माजी आमदार सुजित मिणचेकर यांनी आभार मानले.
फोटो - २२०४२०२१-जेएवाय-०१
फोटो ओळ - कुरुंदवाड येथे गोकूळ निवडणुकीच्या प्रचार सभेत पालकमंत्री सतेज पाटील यांनी मार्गदर्शन केले.