लोकमत न्यूज नेटवर्क, भीमगोंडा देसाई, कोल्हापूर : येथील छत्रपती शाहू स्टेडियमवर सुरू असलेल्या सतेज चषक फुटबॉल स्पर्धेत दिलबहार तालीम मंडळाने आणि बीजीएम स्पोटर्सवर २-१ने विजय मिळवत उपांत्य फेरीत प्रवेश केला. मात्र बलाढ्य दिलबहारला बीजीएमने शेवटपर्यंत झुंजवले. त्यांनी आक्रमक चढाया केल्या, पण अनेक चढाया वाया गेल्याने दिलबहारने विजय खेचून आणला.
पाटाकडील तालीम मंडळातर्फे सतेज चषक फुटबॉल स्पर्धेचे आयोजन केले आहे. दोन्ही संघाकडून जोरदार चढाया करून गोल नोंदविण्याचा प्रयत्न केला. मात्र पूर्वाधात दोन्ही संघांना गोल नोंदवण्यात यश आले नाही. यामुळे सामना गोल शून्य बरोबरीत राहिला. परिणामी उत्तरार्धाकडील खेळाकडे शौकिनांचे लक्ष लागून राहिले. उत्तरार्धात दिलबहारचा संडे ओबेम याने ७५व्या मिनिटास गोल नोंदवला. त्यानंतर बीजीएमच्या वैभव राऊत याने ७६व्या मिनिटाला गोल नोंदवून पुन्हा संघ बरोबरीत नेला. दिलबहारच्या पवन माळी याने ८३व्या मिनिटांस गोल नोंदवून संघास आघाडी मिळवून विजयापर्यंत नेले.
दिलबहारकडून स्वयंम साळुखे, राहुल तळेकर, पवन माळी, सतेज साळुखे, तर बीजीएमकडून ओपेरा, प्रथमेश पाटील, वैभव राऊत, अभिषेक सावंत, संकेत जरग, केवल कांबळे यांनी चांगला खेळ केला.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"