कोल्हापूर : कोल्हापूर जिल्ह्यात मार्च २०२० पासून कोरोना संसर्गाचा प्रभाव आणि त्यामुळे मृत्यू होण्याचे प्रमाण वाढले असून, त्याचा अतिरिक्त भार महानगरपालिकेच्या तिजोरीवर पडला आहे. मार्च २०२० ते मे २०२१ या चौदा महिन्यांच्या कालावधीत कोरोनामुळे मृत्यू झालेल्या व्यक्तींच्या अंत्यसंस्कारावर तब्बल ६३ लाख ८८ हजार २०० रुपयांचे खर्च सोसावा लागला. तथापि, संवेदनशील कोल्हापूरकरांच्या मदतीमुळे हा भार देखील हलका झाला.
संपूर्ण देशाला नवीन असणाऱ्या कोरोना विषाणूचा जसा प्रादुर्भाव वाढला, तसा त्याविरुद्ध लढण्याकरिता सर्व विकासकामे बाजूला ठेवून महानगरपालिका प्रशासनाने निधी उपलब्ध करून दिला. त्याच पद्धतीने आजही निधी उपलब्ध करून दिला जात आहे. मर्यादित उत्पन्न असूनदेखील कोल्हापूर महानगरपालिका प्रशासनाने पालिकेच्या स्वनिधीतून निधी उपलब्ध करून देता देता नाकीनऊ आले. परंतु अडचणीत असलेल्या व्यक्तींना अथवा संस्थेला मदत करण्याची कोल्हापूरकरांची भूमिका येथे सत्कारणी आली.
स्मशानभूमीतील शेणी, लाकडे दान करण्याचे आवाहन गतवर्षी तत्कालीन आयुक्त डॉ. मल्लिनाथ कलशेट्टी आणि विद्यमान प्रशासक डॉ. कादंबरी बलकवडे यांनी केले आणि बघता बघता शेणी व लाकडांची रास लागली. त्यामुळे मृतदेहांवरील अंत्यसंस्काराचा आर्थिक भार काही प्रमाणात हलका झाला. विशेष म्हणजे बाजारात शेणी व लाकडे विकत मिळत नसताना ती देणगीच्या स्वरूपात मिळाली.
पॉईंटर -
- जिल्ह्यातील एकूण कोरोनाबाधित - १ लाख २३ हजार ८२१
- कोरोनामुक्त झालेले रुग्ण - १ लाख ०६ हजार ३३३
- सध्या उपचार घेत असलेले - १३ हजार ५३४
- एकूण मृत्यू - ३९५४
-एका अंत्यसंस्काराचा खर्च १८०० रुपये -
एका अंत्यसंस्काराचा खर्च साधारणपणे १८०० रुपयांपर्यंत येतो. महानगरपालिका प्रशासन स्वनिधीतून हा खर्च करीत आहे. प्रत्येक वर्षी अंत्यसंस्कारासाठी अंदाजपत्रकात ३५ लाखांचे बजेट धरले जाते, परंतु त्याहीपेक्षा जास्त खर्च झाला तरी तो निधी उपलब्ध करून दिला जातो. कोल्हापूर महानगरपालिका ही मोफत अंत्यसंस्काराची जनक आहे. एक मृतदेह जाळण्यासाठी ५०० शेणी (गोवऱ्या) व १६० किलाे लाकडे लागतात. सरण रचल्यानंतर पेटलेली शेण कापरावर ठेवून अग्नी दिला जातो.
-पीपीई किटसह पुरेशी खबरदारी-
मृतदेहांवरील अंत्यसंस्कार करण्याचे काम आरोग्य विभागातील अधीक्षक अरविंद कांबळे यांच्या नेतृत्वाखाली १२ कर्मचारी दिवसरात्र अव्याहतपणे करत आहेत. त्यांना पीपीई किट, हॅन्डग्लोज, साबण, सॅनिटायझर असे प्रतिबंधात्मक साहित्य महापालिका प्रशासनाकडून दिले जाते. गेले वर्षभर काम करत असतानाही स्मशानभूमीतील एकही कर्मचारी कोरोनाबाधित झालेला नाही हे विशेष! सुरुवातीला जिल्हा परिषदेकडून पीपीई किट मिळाले. काहींनी देणगी दाखल दिले. काही महापालिका प्रशासनाने खरेदी केले.
- स्मशानभूमीत झालेले अंत्यसंस्कार-
- मार्च २०२० ते मे २०२१ पर्यंत - १७९२
- मार्च व मे २०२१ पर्यंत- १६५७
- अंत्यसंस्कारासाठी झालेला खर्च - ६३ लाख ८८ हजार २००
कोट -
कोल्हापुरात कोरोनामुळे मृत्यू झालेल्या व्यक्तींवर पंचगंगा स्मशानभूमीत अंत्यसंस्कार करण्याची व्यवस्था करण्यात आली असल्याने कोल्हापूर शहरासह जिल्ह्याच्या ग्रामीण भागासह अन्य जिल्ह्यांतील, राज्यांतील व्यक्तींवर देखील येथे अंत्यसंस्कार केले जात आहेत. त्यामुळे नेहमीपेक्षा जादा संख्या दिसते.
अरविंद कांबळे,
स्मशानभूमी अधीक्षक