कोल्हापूर : कोरोना रुग्णांसाठी ऑक्सिजनची तत्काळ सोय उपलब्ध व्हावी यासाठी पालकमंत्री सतेज पाटील यांनी युद्धपातळीवर निर्णय घेऊन जिल्हा नियोजन समितीमधून २० हजार लिटरचा ऑक्सिजन टँक खरेदी केला असून, मंगळवारी सीपीआर रुग्णालयामध्ये हा टँक बसविण्यात आला. त्यातून शनिवारपासून दिवसाला ४५० रुग्णांना ऑक्सिजनची सोय होऊ शकेल.रुग्णालयाच्या परिसरात ३० फूट उंच, दोन मीटर व्यास असलेला हा लिक्विड ऑक्सिजन टँक बसविण्यात आला. यासोबतच ४०० क्युबिक मीटर प्रतितास क्षमतेचा वेपोरायझरही बसविण्यात आला आहे. हा टँक २० हजार लिटर क्षमतेचा असून यातील एक लिटर द्रवापासून ८५० लिटर वायुरूप ऑक्सिजन मिळणार आहे.
या टँकमधून ह्य सीपीआरह्णमध्ये १५ ठिकाणी असणाऱ्या ऑक्सिजन बँकेमध्ये ऑक्सिजनचा पुरवठा केला जाणार आहे. तेथून पाईपलाईनद्वारे रुग्णांच्या खाटांपर्यंत ऑक्सिजनची सुविधा देण्यात येणार आहे. शनिवार (दि. २२)पर्यंत या टँकमधून ऑक्सिजन पुरविण्याची सुविधा कार्यान्वित होईल, असे डॉ. उल्हास मिसाळ आणि बायोमेडिकल अभियंता वैजनाथ कापरे यांनी सांगितले.