कोल्हापूर : वेशांतर करून नागाळा पार्क परिसरात अपार्टमेंटची रेकी करीत संशयितरीत्या फिरणाऱ्या अनोळखी व्यक्तीच्या विरोधात शाहूपुरी पोलीस ठाण्यात तक्रार दाखल झाली आहे. पोलीस त्याचा शोध घेत आहेत, त्यासाठी पथक नियुक्त केल्याची माहिती पोलीस निरीक्षक श्रीकृष्ण कटकधोंड यांनी बुधवारी दिली.
मध्यम बांधा आणि सव्वापाच फूट उंची असलेला ३० वर्षांची धिप्पाड व्यक्ती दिवस-रात्र महिलांच्या वेशात नागाळा पार्क परिसरात फिरत असते. सायकल व चालत तो परिसरातील अपार्टमेंटची रेकी करीत असतो. नागाळा पार्कातील रत्नोदय सोसायटी, जिल्हा परिषद, वारणा कॉलनी, नागोबा देवालय परिसरात महिलेच्या वेशामध्ये फिरत असताना त्याला नागरिकांनी पाहिले आहे. वारणा कॉलनी चौकात त्याला काही नागरिकांनी पकडण्याचा प्रयत्न केला असता हिसडा मारून त्याने पलायन केले. तोंडाला रुमाल व अंगावर मुलींचा ड्रेस घालून फिरतो. डोळ्याला चष्माही असतो. धष्टपुष्ट असल्याने, तसेच महिलेच्या वेशात असल्याने कोणाला संशय येत नाही. या प्रकाराबाबत काही नागरिकांनी शाहूपुरीचे निरीक्षक कटकधोंड यांची भेट घेऊन तक्रार दिली.
- संशयिताचे सीसीटीव्ही फुटेज
संशयित नागाळा पार्क येथील सोसायटीमध्ये रेकी करीत होता. कोणी नसल्याचे पाहून तो आतमध्ये घुसला. येथील रहिवाशांना शंका आल्याने त्यांनी आरडाओरड करताच त्याने पलायन केले. सीसीटीव्ही फुटेजमध्ये तो महिलेच्या वेशात रेकी करीत असल्याचे दिसत आहे. हा व्हिडिओ सोशल मीडियावरून प्रसारित झाल्याने नागरिकांत भीती पसरली आहे. संशयित दिसून आल्यास पोलिसांशी संपर्क करावा, असे आवाहन निरीक्षक कटकधोंड यांनी केले.