अनिकेतचा खून अनैतिक संबंधातून

शित्तूर-वारुणच्या खुनाचा उलगडा : पत्नीसह प्रियकर भाच्यास अटक; खबऱ्यामुळे लागला तपास

कोल्हापूर : शित्तूर-वारुण (ता. शाहूवाडी) येथील वारणा नदीच्या पुलाखाली शीर नसलेला मृतदेह अनिकेत गजानन चव्हाण (वय २३, रा. सावर्डे, ता. हातकणंगले) याचा असल्याचे मंगळवारी निष्पन्न झाले. अनैतिक संबंधात अडथळा ठरल्यामुळे त्याच्या पत्नीने प्रियकर भाच्याच्या मदतीने खून केल्याचे तपासात उघडकीस आले. या प्रकरणी शाहूवाडी पोलिसांनी संशयित आरोपी पत्नी प्रिया ऊर्फ स्वाती कृष्णा शिंदे (२७, रा. आपटेनगर), तिचा भाचा जयवंत शामराव पाटील (२५, रा. तळसंदे, ता. हातकणंगले) यांना अटक केली. महिन्यापूर्वी अनिकेतचा मृतदेह मिळाला होता. शाहूवाडी पोलिस ठाण्याच्या हद्दीत दि. २ डिसेंबर २०१६ रोजी शित्तूर-वारुण येथील वारणा नदीच्या पुलाखाली शीर नसलेला मृतदेह पोलिसांना मिळाला. या मृतदेहाची ओळख पटली नव्हती. जिल्ह्यात २५ ते ३० वर्षांचा तरुण बेपत्ता असल्याची वर्दी पोलिस ठाण्यात नव्हती. शाहूवाडी पोलिस, स्थानिक गुन्हे अन्वेषण शाखा, शाहूवाडी विभागीय पोलिस उपअधीक्षक विभाग अशी तीन पथके खुन्याचा शोध घेत होते. शाहूवाडी पोलिस उपअधीक्षक सूरज गुरव यांचे सहकारी नंदकुमार घुगरे, शैलेश पोरे यांना खबऱ्याने अनिकेत चव्हाण हा दि. १ डिसेंबर २०१६ पासून गायब आहे. तो बेपत्ता असल्याची तक्रार कुठेही नसल्याचे सांगितले. तपासाचा धागा मिळाल्याने त्यांनी चौकशी केली, तेव्हा अनिकेतचा प्रिया ऊर्फ स्वाती शिंदे हिच्याशी प्रेमविवाह झाला होता. त्यांच्यात वादावादी होत असल्याचे समजले. त्यानुसार पोलिस उपअधीक्षक गुरव यांनी अनिकेतचे वडील कृष्णात गजानन चव्हाण (५०) यांना बोलावून घेतले. शीर नसलेल्या मृतदेहाचे फोटो व कपडे दाखविताच त्यांनी ते ओळखले. त्यानंतर खुनाचा उलगडा झाला. पोलिसांनी जीवरक्षक सुनील कांबळे, त्यांच्या सहकाऱ्यांच्या मदतीने मंगळवारी दिवसभर सरुड येथील वारणा नदीच्या पात्रात शीर टाकलेल्या पिशवीचा शोध घेतला असता ती मिळाली. प्राण्यांनी मांस खाल्ल्याने हाडे व केस मिळाले आहेत.अडथळा केला दूर : पैशासाठी तगाद्याचा राग; काटा काढण्याचा प्लॅनप्रिया शिंदे हिचे पूर्वीपासून भाचा जयवंत पाटील याच्याशी अनैतिक संबंध होते. याची चाहूल अनिकेतला लागल्याने त्यांच्यात नेहमी खटके उडत. अनिकेतने पैशांसाठी तिच्याकडे तगादा लावला होता. आपल्या अनैतिक संबंधात अडथळा ठरत असल्याचा राग तिला होता. तिने याची कल्पना भाचा जयवंतला दिली. त्यानुसार त्यांनी अनिकेतचा काटा काढायचा प्लॅन आखला. प्रियाने फोन करून अनिकेतला १ डिसेंबरला घरी बोलावून घेतले. रात्री झोपल्यानंतर अकराच्या सुमारास जयवंत घरी आला. पहाटे चारच्या सुमारास अनिकेत झोपेत असताना तलवारीचा वर्मी वार डोक्यात केला. त्याला ओरडताही आले नाही. त्यानंतरही अनिकेत तासभर जिवंत होता. त्यानंतर गळा आवळून तलवारीने शीर धडावेगळे केले. दिवसभर मृतदेह घरातच ठेवला. बाहेरून प्लास्टिक कागद खरेदी करून आणला. प्लास्टिक कागदासह ब्लँकेटमध्ये मृतदेह गुंडाळून दोरीने बांधला. त्याचे शीर एका पिशवीत दगड घालून स्वतंत्र बांधून घेतले. सायंकाळी सहा वाजता स्प्लेंडर मोटारसायकलवर गाठोडे बांधले. हँडेलला पिशवी अडकवली. जयवंत हा भाजी विक्रीचा व्यवसाय करत असल्याने तो नेहमी भाजीपाल्याचे गाठोडे बांधून प्रियाच्या घरी येत असे. त्यामुळे आजूबाजूच्या लोकांना शंका आली नाही. तेथून तो मृतदेहाचे गाठोडे घेऊन शिवाजी पूल, बोरपाडळे, बांबवडेमार्गे सरुड येथे आला. तेथे शीर वारणा नदीत टाकले.त्यानंतर पुढे शित्तूर-वारुण नदीपुलाखाली धड टाकून तो परत आपटेनगर येथे आला. खुनातील तलवार विहिरीत टाकल्याने पोलिस शोध घेत आहेत.अशी झाली ओळख अनिकेत चव्हाण हा महादेव चव्हाण (रा. आंबेवाडी) यांच्या ट्रॅव्हर्ल्सवर चालक म्हणून काम करत होता. प्रिया शिंदे हिचे पहिले लग्न कांचनवाडी येथील तरुणाशी झाले. त्यांना एक आठ वर्षांची मुलगी आहे. पतीसोबत वादावादी झाल्याने ती तीन वर्षांपासून आपटेनगर येथे भाड्याने विभक्त राहू लागली. त्यानंतर तिने टोप-संभापूर (ता. हातकणंगले) येथे मसाज सेंटर सुरू केले. याठिकाणी अनिकेत तीन-चारवेळा गेल्याने तिच्याशी ओळख झाली. त्यातून त्यांचे प्रेमसंबंध जुळले. अडीच वर्षांपूर्वी दोघांनी न्यायालयीन नोंदणी पद्धतीने प्रेमविवाह केला.