डोंबिवली: भावाला जेवण का देत नाही असे विचारण्यासाठी गेलेल्या दिराचा भावजयीने छातीत चाकू खुपसून खून केल्याचा प्रकार पुर्वेकडील सोनारपाडा परिसरात रविवारी दुपारी साडेतीनच्या सुमारास घडला. तर दिराचा खून करणा-या भावजयीनं देखील स्वत:च्या हाताची नस कापून घेतल्या असून तीच्यावर खाजगी रूग्णालयात उपचार सुरू आहेत.
सोनारपाडा परिसरात राहणारे संदीप मेंगाने आणि त्याची पत्नी संगीता या दोघांमध्ये चार दिवसांपासून घरगुती वाद सुरू होते. यात संदीप घरात जेवला नव्हता. ही बाब त्याच परिसरात राहणा-या भाऊ सागरला कळताच त्याने संदीपच्या घरी जाऊन त्याची पत्नी संगीताला तु भावाला जेवण का देत नाही अशी विचारणा केली. यावरून सागर आणि संगीताचे कडाक्याचे भांडण झाले. या वादात तीने सागरच्या छातीत चाकूने खुपसले यात तो गंभीर जखमी झाला. त्याला उपचारासाठी खाजगी रूग्णालयात दाखल केले असता उपचारापुर्वीच त्याचा मृत्यू झाला.
भावजय संगीता हिने देखील चाकूने डाव्या हाताच्या नसा कापून घेतल्याने तीच्यावर रूग्णालयात उपचार सुरू आहेत. मृत सागरच्या पत्नीने दाखल केलेल्या तक्रारीवरून संगीता हिच्यावर खूनाचा गुन्हा मानपाडा पोलिस ठाण्यात दाखल झाला आहे.