कल्याण : मंत्रिमंडळात एखादे मंत्रिपद रिपाइंला मिळेल, अशी आशा आहे. परंतु, मनसेला मंत्रिमंडळात घेण्याचा काही संबंधच येत नाही. ते काही निवडणुकीत आमच्याबरोबर नव्हते. त्यांना मंत्रिपद देण्याचा विचार होत असेल तर आमचा विरोध असेल, असे मत केंद्रीय राज्यमंत्री रामदास आठवले यांनी कल्याणमध्ये व्यक्त केले.
आठवले हे रविवारी एका कार्यक्रमानिमित्त आले असता पत्रकारांशी बोलताना मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी केलेल्या धाडसाचे कौतुक केले.
अनेक वर्षे शिवसेनेत वाढलेले, बाळासाहेब आणि उद्धव ठाकरे यांच्या नेतृत्त्वात काम केलेले, आनंद दिघे यांचा आशीर्वाद असलेले शिंदे हे नेते असून, त्यांनी केलेले बंड हे महाबंड आहे. दोन तृतीयांशपेक्षा जास्त आमदार आपल्या बाजूने वळविण्यात शिंदे यांना यश आले आहे. उद्धव यांना या आमदारांना सांभाळता आले नाही आणि ते भाजपचे आहेत, अशा पद्धतीचा आरोप जे संजय राऊत करत आहेत, ते अत्यंत चुकीचे असल्याचे आठवले म्हणाले.