अनिकेत घमंडी, डोंबिवली: दिवसेंदिवस वाढत चाललेल्या महिलांवरील अन्यायाच्या घटनांची दखल घेत वरिष्ठांनी आदेश दिल्यानुसार डोंबिवली लोहमार्ग पोलिसांनी रेल्वे डब्यात, स्थानकात, पादचारी।पुलांवर, तिकीट घराचा परिसर आदी सर्व ठिकाणी महिलांविषयक कायद्याची आणि आर्थिक फसवणूक संदर्भात जनजागृती उपक्रम हाती घेतला आहे. त्याद्वारे शेकडो महिलांना संदेश देऊन सतर्क राहण्याचा सल्ला वरिष्ठ पोलीस निरीक्षक अर्चना दुसाने यांनी दिला.
गेल्या आठवड्यापासून अधिक जोमाने सुरू झालेल्या या उपक्रमासंदर्भात सोमवारी त्यांनी माहिती दिली. त्या म्हणाल्या की, महिलांच्या सुरक्षेकरीता रात्रीच्या व पहाटेच्या वेळी महिलांकरीता राखीव डब्यांमध्ये रेल्वे पोलीसांकडुन सुरक्षा कर्मचारी नेमण्यात आले आहेत. महिला प्रवाशांनी महिलांकरीता राखीव असलेल्या डब्यातुन प्रवास करावा. महिलांनी एकटे राखीव डब्यातुन प्रवास करतांना सुरक्षा कर्मचारी डब्यामध्ये आहे यांची खात्री करावी. सुरक्षा कर्मचारी नसल्यास, प्रवाशी असलेल्या डब्यातुन प्रवास करावा.
रेल्वे स्टेशन अथवा रेल्वे प्रवासात कोणत्याही प्रकारची छेडछाडीची घटना होत असल्यास त्याची माहिती तात्काळ कर्तव्यावरील पोलीस अंमलदार अथवा रेल्वे पोलीस हेल्पलाईन क्र. १५१२ यांना कळवावी. लोकल गाडयांमध्ये चढण्यापुर्वी उतरणाऱ्या प्रवाशांना प्रथम उतरु द्यावे. लोकल गाडयांमध्ये चढतांना अथवा उतरतांना व प्रवासादरम्यान आपला मोबाईल, सॅगबॅग व इतर मौल्यवान चिज वस्तुंवर लक्ष द्यावे. लोकल मध्ये चढतांना अथवा उतरतांना आपल्या जवळील सॅगबॅग पाठीवर न लावता समोर धरावी जेणेकरुन चोरांना चोरी करण्याची संधी मिळणार नाही, तसेच गर्दीत इतर प्रवाशांना त्रास होणार नाही, याची काळजी सगळ्यांनी घ्यावी.
प्रवासादरम्यान रॅकवर ठेवलेली सॅगबॅग व इतर सामान वारंवार चेक करुन रॅकवर असल्याची खात्री करावी. प्रवासा दरम्यान दरवाजात लटकुन प्रवास करु नये त्यामुळे जिवीतास तसेच मालमत्तेस धोका होऊ शकतो यावर जनजागृती करण्यात आली. तसेच आर्थिक फसवणूक विरोधात जन जागृती कार्यक्रमात राज्यात अल्पावधीत पैसे दुप्पट करण्याचे आमिष दाखवत गुंतवणूकदारांना लुबाडण्याच्या घटनांमध्ये दिवसेंदिवस वाढ होत आहे. फसव्या गुंतवणूक योजनांमधून हजारो गुंतवणूकदारांची फसवणूक केली जाते. त्यामुळे अनेकांचे संसार उद्धवस्त झालेले आहेत. राज्यात काही भामटे पैसे दामदुप्पट करण्याचे आमिष दाखवून, खोट्या स्कीम काढून इतरांपेक्षा जास्त व्याजदराने आमिष दाखवून हजारो लोकांची फसवणूक करीत आहेत. अशा योजनांपासून जनतेने दूर राहावे व आपली फसवणूक टाळावी.
पासपोर्ट, आधारकार्ड, पॅनकार्ड तात्काळ काढून देण्याचे आमिष दाखवून आर्थिक फसवणूक होऊ शकते. एजंट मार्फत घर, जमीन खरेदीच्या वेळी सावध रहा. त्यामध्ये देखील पैशाची मागणी करून आर्थिक फसवणूक होऊ शकते. ऑनलाइन खरेदी करिता अनेक फसव्या साईड्स इंटरनेट वर उपलब्ध आहेत त्याच्या कडून देखील अनेकांची आर्थिक फसवणूक करण्यात आली आहे. त्याकरिता कोणतेही आर्थिक व्यवहार करताना अधिक दक्ष व सतर्क राहावे असे आवाहन पोलिसांनी सामजिक बांधिलकी जपण्याच्या उद्देशाने केले. त्यासाठी पोलीस उपनिरीक्षक, दोन अंमलदार, व ६ होमगार्ड अशी स्वतंत्र पथक तयार करून त्यांना दैनंदिन कामाच्या जबाबदारीसह हे जनजागृती करण्याची जबाबदारी दिली आहे.