कल्याण : मुख्याध्यापिका असलेल्या पत्नीने मुलीच्या दोन मित्रांच्या मदतीने पतीच्या अंगावर ज्वलनशील पदार्थ टाकून जाळले. त्यामुळे घराला आग लागली. उपचारादरम्यान पतीचा मृत्यू झाला. पतीच्या हत्येप्रकरणी कोळसेवाडी पोलिसांनी पत्नी अश्विनी पवार हिला अटक केली आहे. तर दोन तरुणांचा पोलिस शोध घेत आहेत.
विजयनगर परिसरातील विशालनगरी कॉम्प्लेक्समध्ये हरिश्चंद्र हे आपली पत्नी अश्विनी व दोन मुलींसह राहत होते. खासगी सुरक्षारक्षक असलेले हरिश्चंद्र काही महिन्यांपूर्वी निवृत्त झाले होते. त्यांची पत्नी अश्विनी कल्याणमधील एका शाळेत मुख्याध्यापिका आहे. त्यांच्या मोठ्या मुलीचे लग्न झाले आहे, तर लहान मुलगी ही घरीच असते. हरिश्चंद्र व पत्नी अश्विनी यांच्यात नेहमी वाद व्हायचे.
शुक्रवारी रात्रीही या दोघांमध्ये वाद झाला. यावेळी अश्विनी यांच्या मुलीचे दोन मित्रही घरात होते. रागाच्या भरत अश्विनी यांनी हरिश्चंद्र यांच्या अंगावर ज्वलनशील पदार्थ टाकला. क्षणार्धात हरिश्चंद्र भाजले. गंभीर जखमी झालेल्या हरिश्चंद्र यांना उपचारासाठी खासगी रुग्णालयात दाखल केले. रविवारी सकाळी उपचारादरम्यान त्यांचा मृत्यू झाला.
पती-पत्नीमध्ये पेन्शनच्या पैशांवरून वाद होत असल्याची माहिती सूत्रांनी दिली, मात्र पोलिसांकडून याबाबत दुजोरा मिळाला नाही.